ज्येष्ठ नागरिकांना मोफत कवळी वाटप

ज्येष्ठ नागरिकांना मोफत कवळी वाटप
डोंबिवली, ता. २२ : डॉ. कांबळी सोल्युशन आणि इन्फिनिटी फाउंडेशन, डोंबिवली यांच्या संयुक्त विद्यमाने गरजू ज्येष्ठ नागरिकांना मोफत डेंचर (कवळी) वाटप करण्यात आले. भाजपाचे नवनिर्वाचित प्रदेशाध्यक्ष आमदार रवींद्र चव्हाण यांच्या हस्ते १०० हून अधिक ज्येष्ठ नागरिकांना मोफत कवळी देण्यात आली. या उपक्रमाचे आयोजन रविवारी करण्यात आले होते. कार्यक्रमात डॉ. अमेय कांबळी, डॉ. दीपा कांबळी, डॉ. रिधय कांबळी, तसेच इन्फिनिटी फाउंडेशनचे अध्यक्ष अमित देवस्थळी, कार्याध्यक्ष गौरी डेंगळे, रमेश डेंटल लॅबचे रमेश कोटियन, डेंचर तज्ज्ञ समीर कदम, अमोल वादवल, डॉ. सिद्धी भोसले, डॉ. नितीन सोनवणे आदी उपस्थित होते.

आमदार रवींद्र चव्हाण यांची भाजप प्रदेशाध्यक्षपदी निवड झाल्याबद्दल त्यांची अन्नधान्य तुला करून सत्कार करण्यात आला. ही अन्नधान्य सामग्री पूर्वांचल वसतिगृहातील स्वयंसेवकांना सुपूर्त करण्यात आली. या वेळी बोलताना चव्हाण म्हणाले, की हा सत्कार म्हणजे डोंबिवलीकरांचा माझ्यावरील विश्वास आणि आपुलकीचं प्रतीक आहे. संघटन आणि समाजहितासाठी आपण कायम काम करीत राहू. डॉ. कांबळी कुटुंबीयांनी आरोग्यसेवेसोबत सामाजिक जबाबदारीही उत्तमरीतीने निभावली आहे. २५ वर्षांची त्यांची सेवा उल्लेखनीय आहे, असे सांगून त्यांनी कांबळी क्लिनिकच्या कार्याचे कौतुक केले.

मूळ डोंबिवलीकर असलेले डॉ. अमेय कांबळी आणि त्यांची पत्नी दोघेही डेंटल स्पेशालिस्ट असून, त्यांचा दवाखाना सावरकर रोड येथे आहे. विशेष म्हणजे कोपर येथे स्वस्त दरात डेंटल क्लिनिक सुरू करून हजारो गरीब व गरजू रुग्णांना दंत उपचार उपलब्ध करून देण्याचे कार्य त्यांनी केले आहे. हा उपक्रम सामाजिक बांधिलकी जपणारा आणि आरोग्यसेवा जनसामान्यांपर्यंत पोहोचवणारा असल्याचे मत उपस्थितांनी व्यक्त केले.