अमली पदार्थ आता ग्रामीण भागातही

वाडा, ता. २२ (बातमीदार) : कुडूस येथील एक व्यक्ती कारमधून ठाण्यातील मुंब्रा येथे जात असताना झडती घेतली असता एक कोटी ६९ लाख २६ हजारांचा एमडी हा अमली पदार्थ आढळून आला होता. त्यामुळे ग्रामीण भागातही अमली पदार्थांची विक्री होत असल्याचे उघडकीस आले आहे. या प्रकाराने कुडूसमध्ये खळबळ उडाली असून, हा चर्चेचा विषय झाला आहे.

१८ जुलै रोजी गोपनीय सूत्रांकडून प्राप्त झालेल्या माहितीच्या आधारे, मुंब्रा बायपास उड्डाणपुलालगत गुन्हे शाखा पथक १ ने रचलेल्या सापळ्यामध्ये मोहनलाल गुणेशाजी जोशी उर्फ शर्मा (वय ५५) हा एमएच ४८ ए ३१२६ मधून जात असताना त्याला ताब्यात घेऊन कारची झडती घेतली. त्यामध्ये एक किलो २०९ ग्रॅम वजनाचा एमडी हा अमली पदार्थाचा साठा मिळून आला. याबाबत मुंब्रा पोलिस ठाण्यात गुन्हा नोंद करण्यात आला आहे. संशयित आरोपी हा कुडूस येथील प्रगती नगरमध्ये राहणारा असून, त्याचे कुडूस नाका येथे औषधांचे दुकान आहे. त्याने हा माल कोठून व कसा आणला, याबाबत तपास सुरू आहे.