डॉक्टर, परिचारिकेविना ‘आपला दवाखाना’

डॉक्टर, परिचारिकेविना ‘आपला दवाखाना’
ठाण्यातील रायगड गल्लीतील प्रकार

सकाळ वृत्तसेवा

ठाणे, ता. २२ : गोरगरीब रुग्णांना मोफत व उत्तम आरोग्यसेवा मिळावी, यासाठी राज्य शासनाच्या मध्यमातून ‘आपला दवाखाना’ ही योजना राबविण्यात येत आहे. मात्र ठाण्यातील रायगड गल्लीत या योजनेंतर्गत सुरू करण्यात आलेला आपला दवाखाना डॉक्टर व परिचारिकेविना सुरू असल्याचा धक्कादायक प्रकार समोर आला आहे. त्यामुळे आपला दवाखाना या योजनेचे गांभीर्य पालिकेला नसल्याचे दिसून येत असून, संबंधितांवर कारवाई करण्याची मागणी केली जात आहे.
राज्य सरकारच्या आरोग्य विभागाची ‘आपला दवाखाना’ ही प्रमुख योजना आहे. या योजनेंतर्गत राज्यातील रुग्णांना मोफत आरोग्य तपासणी, औषधे, रक्त व आरोग्य तपासणी आणि सवलतीच्या दरात निदान सेवा असे फायदे दिले जातात. आपल्या भागातच रुग्णांना वेळीच मोफत उपचार व्हावेत, असा या योजनेचा उद्देश आहे. मात्र ‘आपला दवाखाना’मध्ये रुग्णांना सुविधा मिळत नसल्याचा आरोप होत आहे.
---------------------------------------
रुग्णांवर उपचार नाहीत
महापालिकेच्या वतीने रायगड गल्लीत ‘आपला दवाखाना’ सुरू करण्यात आला आहे. या ठिकाणी टेकडी बंगला येथील रुग्ण पांडुरंग कोंगरे नुकतेच रात्री साडेआठच्या सुमारास टीटीचे इंजक्शन घेण्यासाठी गेले होते. त्या वेळी आपला दवाखाना येथे डॉक्टर, परिचारिकेसह एकही कर्मचारी उपस्थित नव्हता. या ठिकाणी कोणीही हजर नसल्यामुळे अनेक रुग्णांना उपचाराविना परतावे लागले. या प्रकाराची माहिती रुग्णांनी भाजपाचे माजी गटनेते नारायण पवार यांना दिली. या प्रकाराची नारायण पवार यांनी महापालिकेकडे तक्रार केली आहे.
------------------------------------
दरम्यान, डॉक्टर, परिचारिका नियुक्तीचे कंत्राट दिलेल्या संबंधित कंत्राटदारावर कठोर कारवाईची मागणी केली आहे. आपला दवाखाना सुरू करण्यामागील उद्देश साध्य होत नसून, कोट्यवधी रुपयांची उधळपट्टी होत आहे. त्याऐवजी राज्य सरकार व महापालिकेच्या सार्वजनिक हॉस्पिटलमध्ये रुग्णांना सुविधा पुरवाव्यात, अशी मागणी नारायण पवार यांनी केली आहे.