जामिनावर सुटलेल्या आरोपीचे फटाकेबाजी करीत स्वागत

जामिनावर सुटलेल्या आरोपीचे फटाके उडवत स्वागत
उल्हासनगरात पुन्हा गंभीर प्रकार

उल्हासनगर, ता. २२ (बातमीदार) ः विनयभंग प्रकरणात जामिनावर सुटलेल्या आरोपीचे पीडितेच्या घरासमोर मिरवणूक काढून फटाके उडवत स्वागत केल्याची घटना ताजी असतानाच आता याच परिसरात खुनाच्या प्रयत्नाच्या गुन्ह्यात जामिनावर सुटलेल्या आरोपीचे फटाक्यांसह जल्लोषात स्वागत करण्यात आल्याचा व्हिडिओ व्हायरल झाला आहे. या दोन्ही प्रकारांनी समाजात गुन्हेगारीचे उदात्तीकरण होत असल्याची टीका सर्वत्र होऊ लागली आहे.
यासंदर्भात पोलिस उपायुक्त सचिन गोरे यांच्याशी संपर्क साधला असता ते बैठकीत असल्यामुळे त्यांची प्रतिक्रिया मिळू शकली नाही. घटनेबाबत सविस्तर माहिती अशी की, उल्हासनगर कॅम्प क्रमांक २ मधील रमाबाई टेकडी येथे २७ एप्रिलच्या रात्री दारूच्या नशेत झालेल्या वादातून एकाला लोखंडी तलवार व रॉडने मारहाण करण्यात आली होती. याप्रकरणी पोलिसांनी खुनाचा प्रयत्न व गुन्हेगारी कृत्यांमध्ये सहभागी असलेल्या दिवाकर यादवसह अन्य आरोपींवर गुन्हा दाखल केला होता. १७ जुलैला दिवाकर यादव याचा जामीन झाल्यावर फटाके फोडत त्याची मिरवणूक काढल्याचा सीसीटीव्ही फुटेजचा व्हिडिओ व्हायरल झाला आहे. २७ एप्रिलच्या रात्री हंशू झा याचा मिलन सहानी याच्याशी त्याचा वाद झाला. त्यानंतर दिवाकर यादव, सुनील यादव, प्यारेलाल यादव, ज्योती यादव यांनी हंशू झा याच्यावर लोखंडी तलवार व रॉडने हल्ला केला. तसेच रेखा झा, बिपीन झा आणि रोहित झा आदींना जीवघेणे वार करीत गंभीर दुखापत केली होती. याप्रकरणी उल्हासनगर पोलिस ठाण्यात गुन्हा दाखल करण्यात आला होता. दरम्यान, विनयभंग प्रकरणातून सुटलेल्या रोहित झा याच्या समर्थकांनी पीडितेच्या घरासमोर मिरवणूक काढल्याने सर्वत्र संताप व्यक्त होत असताना तशीच दुसरी घटना समोर आली आहे.