खंडणीखोर आरटीआय कार्यकर्ता जेरबंद

खंडणीखोर आरटीआय कार्यकर्ता जेरबंद
ठाणे खंडणीविरोधी पथकाची कारवाई
सकाळ वृत्तसेवा
ठाणे, ता. २२ : कल्याण परिसरातील एका हॉटेल व्यवसायिकाविरुद्ध खोट्या तक्रारी करण्याची धमकी देत खंडणीची मागणी करीत त्याच्याकडून ५० हजार रुपये स्वीकारणाऱ्या आरटीआय कार्यकर्ता नितीन शांताराम घोले (४९) याला ठाणे खंडणी विरोधी पथकाने अटक केली. ही कारवाई सोमवारी (ता. २१) रात्री करण्यात आली. तसेच अशाप्रकारे कोणाकडे मागणी केली असल्यास जवळच्या पोलिस ठाण्यात जाऊन तक्रार दाखल करण्याचे आवाहन ठाणे शहर खंडणी विरोधी पथकाचे प्रमुख शैलेश साळवी यांनी केले आहे.

तक्रारदार देवराज पुजारी यांनी ठाणे शहर खंडणी विरोधी पथकाकडे तक्रार अर्ज दाखल केला होता. त्या अनुषंगाने कल्याण पश्चिम येथे सापळा रचून ५० हजार रुपये घेताना सोमवारी रात्री आरटीआय कार्यकर्ता घोले याला रंगेहाथ पकडले. याप्रकरणी महात्मा फुले चौक पोलिस ठाण्यात गुन्हा दाखल करून न्यायालयात हजर करण्यात आले असून, पुढील तपास खंडणी विरोधी पथक करीत आहे.

घोले हा स्वतः आरटीआय कार्यकर्ता असल्याचे सांगत असे. त्यास पोलिस व इतर शासकीय अधिकारी घाबरत असून, त्याला पैसे दिले नाही तर खोट्या गुन्ह्यात अडकविण्याची धमकी देत खंडणी मागत असल्याचे निष्पन्न झाले आहे. त्याने अशाप्रकारे इतरही हॉटेल व्यावसायिकांकडून खंडणी घेतल्याची शक्यता आहे. तशी मागणी झाली असल्यास संबंधितांनी नजीकच्या पोलिस ठाण्यात जाऊन तक्रार दाखल करण्याचेही आवाहन खंडणी विरोधी पथकाने केले. ही कारवाई ठाणे पोलिस उपायुक्त, (गुन्हे) अमरसिंह जाधव, सहाय्यक पोलिस आयुक्त, शोध-२, विनय घोरपडे यांच्या मार्गदर्शनाखाली खंडणी विरोधी पथकाचे वरिष्ठ पोलिस निरीक्षक शैलेश साळवी, सहाय्यक पोलिस निरीक्षक कृष्णा गोरे, पोलिस हवालदार कानडे, शिंदे, हिवरे, पोलिस नाईक हासे, पोलिस शिपाई ढाकणे यांनी केली.