महानिर्मितीच्या संचालक (वित्त) पदी मनेष वाघीरकर

महानिर्मितीच्या संचालकपदी (वित्त) मनेष वाघीरकर
मुंबई, ता. २१ : मनेष विश्वनाथ वाघीरकर यांनी नुकताच ऊर्जा क्षेत्रातील महाराष्ट्र राज्य वीजनिर्मिती कंपनीचे संचालक (वित्त) म्हणून पदभार स्वीकारला आहे. त्यांनी स्थापत्य अभियांत्रिकीमध्ये पदवी प्राप्त केली असून, त्यांना २६ वर्षांचा प्रशासकीय सेवेचा अनुभव आहे. वाघीरकर यांनी यापूर्वी कोषागार अधिकारी, जालना, सहाय्यक संचालक स्थानिक निधी लेखा, ठाणे, सहसंचालक, महाराष्ट्र लघुउद्योग विकास महामंडळ तसेच मुख्य वित्त अधिकारी, ठाणे महापालिका आणि वित्त नियंत्रक, झोपडपट्टी पुनर्वसन प्राधिकरण, मुंबई म्हणून प्रशासकीय सेवा केली आहे. कोविडमध्ये नोडल ऑफिसर असताना अन्न पुरवठा तसेच तात्पुरते कोविड हॉस्पिटल उभारणी अशा जबाबदाऱ्या त्यांनी पार पाडल्या आहेत. ठाणे महापालिकेमध्ये वाघीरकर यांच्या पुढाकारातून हॅप्पीनेस इंडेक्स बजेट तसेच एक रुपयात आरोग्यसेवा आदी नावीन्यपूर्ण उपक्रम सुरू केले. आपल्या महाराष्ट्र लघु उद्योग विकास महामंडळ येथील कर कार्यकाळामध्ये अनेक ‘स्टार्ट अप’ (लघु उद्योग) यांना व्यवसाय वृद्धीकरिता राष्ट्रीय पातळीवर प्रगती मैदान, दिल्ली येथे प्लॅटफॉर्म उपलब्ध करून दिला आहे. महानिर्मितीतर्फे किफायतशीर दरामध्ये अखंडित वीज उत्पादन ठेवणे. तसेच औष्णिककडून हरित ऊर्जेकडे वाटचालीला गती देणे आणि नियोजित वेळेमध्ये प्रकल्प उभारणी करताना प्रस्तावित वीज प्रकल्पांना गती देणे हे आपले प्राधान्यक्रम असल्याचे वाघीरकर यांनी सांगितले.