कुल्हडमधील चहा, छासला विरोध

कुल्हडमधील चहा, छासला विरोध
पश्चिम रेल्वेवरील सहा स्थानकांवर सेवा; स्टॉलधारकांकडून नाराजी

सकाळ वृत्तसेवा
मुंबई, ता. २२ : पश्चिम रेल्वेच्या उपनगरी मार्गावरील प्रवाशांना आता चहा आणि छासचा आस्वाद पारंपरिक कुल्हडमधून घेता येणार आहे. पर्यावरणपूरक उपक्रम म्हणून रेल्वे बोर्डाने १२ स्थानकांवर हा निर्णय लागू केला असून, त्यातील सहा स्थानके मुंबईच्या उपनगरी मार्गावरील आहेत, मात्र याला स्टॉलधारकांनी आर्थिक कारणांमुळे विरोध केला आहे.

रेल्वे बोर्डाने संबंधित स्थानकांवरील टी स्टॉल्स आणि रस विक्रेत्यांना याबाबतचे निर्देश देऊन, १७० मि.ली. चहा आणि २२० मि.ली. छास कुल्हडमध्येच देणे अनिवार्य केले आहे. चहा टी स्टॉलवर तर छास ज्यूस स्टॉलवर मिळणार आहे. मुंबई विभागातील दादर, मुंबई सेंट्रल टर्मिनस, वांद्रे लोकल, अंधेरी, पालघर आणि डहाणू रोड ही सहा स्थानके ‘कुल्हड अनुपालन स्थानके’ म्हणून घोषित करण्यात आली आहेत, तर बिलीमोरा, वलसाड, वापी, नवसारी, सूरत आणि नंदुरबार स्थानकांचाही यात समावेश आहे, मात्र रेल्वेच्या या निर्णयामुळे स्टॉलधारक नाराज झाले असून, आर्थिकदृष्ट्या हा निर्णय व्यवहार्य नसल्याचे त्यांचे म्हणणे आहे. ‘पाच रुपयांच्या चहासाठी मातीचा कुल्हड वापरणे परवडणारे नाही. हे कुल्हड सर्वत्र सहज उपलब्ध होत नाहीत. कुंभाराकडून खास बनवून घ्यावे लागतात, शिवाय त्यांचे संकलन, वाहतूक आणि देखभाल खर्चिक असल्याचे स्टॉलधारकांनी सांगितले. मुंबईसारख्या शहरात कुल्हड वापरणे अवघड असल्याचेही अनेक विक्रेत्यांनी नमूद केले. चिनी मातीचे कुल्हड सुपर मार्केटमध्ये मिळतात, पण तेही महाग आहेत आणि वापरात तोट्यात जातात. वरून सततचा तुटफुटीचा धोका आणि देखभाल खर्च वेगळाच, असेही विक्रेत्यांचे म्हणणे आहे.

स्वस्त चहा कसा मिळणार?
रेल्वेच्या या नव्या आदेशामुळे विक्रेत्यांचे गणितच बिघडले आहे. स्वस्त दरात चहा आणि छास विकताना महाग कुल्हडचा खर्च परवडणार नाही, अशी विक्रेत्यांची स्पष्ट भूमिका आहे. प्रशासनाने व्यवहार्य पर्याय उपलब्ध करून द्यावा, अशी मागणीही सुरू झाली आहे.