‘घोडबंदर’वर अपघातात दोघांचा मृत्यू

‘घोडबंदर’वर अपघातात दोघांचा मृत्यू
तीन तास वाहतूक कोंडी

सकाळ वृत्तसेवा
ठाणे, ता. २२ : नवी मुंबईतून लोखंडी पाइप आणि रॉड घेऊन घोडबंदर रोडने गुजरात येथे निघालेल्या ट्रकने पातलीपाडा उड्डाणपुलावर विद्युत खांबांना जोरदार धडक दिली. या धडकेत ट्रक केबिनमध्ये अडकलेल्या चालक विनोद (वय ४२) आणि हेल्पर रहीम पठाण (वय २५) या दोघांचा मृत्यू झाला आहे. ते दोघे उत्तर प्रदेशमधील रहिवासी होते. ही घटना सोमवारी (ता. २१) मध्यरात्री साडेबारा वाजण्याच्या सुमारास घडली.
या अपघाताने त्या उड्डाणपुलाच्या दोन्ही वाहिन्यांवरील वाहतुकीला तब्बल तीन तासांचा ब्रेक लागला होता. या घटनेची माहिती वाहतूक पोलिसांनी पालिकेच्या आपत्ती व्यवस्थापन कक्षाला दिली. घटनास्थळी वाहतूक पोलिस, आपत्ती व्यवस्थापन कक्ष, अग्निशमन दल या विभागांनी तातडीने धाव घेतली. तसेच अडकलेल्या दोघांना बाहेर काढून ठाणे जिल्हा शासकीय रुग्णालयात उपचारार्थ दाखल केले. त्या वेळी कर्तव्यावर असलेल्या वैद्यकीय अधिकाऱ्यांनी तपासणी करून चालक विनोद आणि हेल्पर रहीम या दोघांना मृत घोषित केले. घटनास्थळी अपघातग्रस्त ट्रकमधील लोखंडी पाइप व लोखंडी रॉड रस्त्यावरती पडले होते. ते मशीनच्या सहाय्याने एका बाजूला करण्यात आले. याशिवाय अपघातग्रस्त ट्रक सुमारे तीन तासांच्या प्रयत्नानंतर रोडच्या एका बाजूला करण्यात आला. त्याचबरोबर पाणी मारून रस्त्यावरील तेल साफ करण्यात आले. यादरम्यान दोन्ही वाहिन्यांवरील वाहतूक सुमारे तीन तास बंद करण्यात आली होती. वाहतूक सेवा रस्त्यावरून धीम्या गतीने सुरू होती, अशी माहिती ठाणे महापालिका आपत्ती व्यवस्थापन अधिकाऱ्यांनी दिली.