वाहनाच्या धडकेने सात गायी जागीच मृत्यू

वाहनाच्या धडकेने सात गायींचा जागीच मृत्यू

कासा, ता. २२ (बातमीदार) ः मुंबई-अहमदाबाद महामार्गावर सोमवारी (ता. २१) पहाटे भीषण अपघात घडला. गुजरातहून मुंबईकडे येणाऱ्या मार्गावर, दापचारी जकात नाक्याच्या पुढे भरधाव वेगाने आलेल्या वाहनाने गुरांच्या कळपाला जबर धडक दिली. या दुर्घटनेत सात गायी जागेवरच मृत्युमुखी पडल्या, तर तीन गायी गंभीर जखमी झाल्या आहेत.
घटनेची माहिती मिळताच कासा-चारोटी विभागातील प्राणिमित्र, गोरक्षक आणि तलासरी पोलिस घटनास्थळी दाखल झाले. जखमी गायींना तत्काळ टेम्पोमधून उमरगाव येथील गोशाळेत उपचारासाठी हलवण्यात आले. मृत गायींच्या मृतदेहांवर दफनाची प्रक्रिया सुरू करण्यात आली.
सध्या पावसाळ्याचे दिवस असल्याने महामार्गाच्या कडेला व मध्यभागी भरपूर हिरवे गवत उगवले आहे. यामुळे मोकाट जनावरे महामार्गावर चारा शोधत फिरत असतात. रात्रीच्या अंधारात गुरांचे कळप रस्त्यावर बसलेले असतात आणि वाहनांची मोठ्या प्रमाणावर वाहतूक सुरू असल्याने जीवघेण्या धडकांची शक्यता वाढते. महामार्ग प्राधिकरणाने काही ठिकाणी लोखंडी बॅरिकेड्स, बांबूंच्या कुंपणाद्वारे गुरांचा वावर थांबवण्याचा प्रयत्न केला असला, तरी तो अत्यंत अपुरा आहे. गोरक्षकांनी प्रशासनाकडे ठोस उपाययोजना करण्याची मागणी केली आहे.
...
दररोज अपघात!
या घटनेबाबत बोलताना प्राणिमित्र बाबू सिंग म्हणाले, ‘‘महामार्गावर दररोज एखाद्या ना एखाद्या गुराचा अपघात होतच असतो. अपघाताची माहिती मिळताच आम्ही घटनास्थळी पोहोचून तीन जखमी गायींना उपचारासाठी उमरगाव गोशाळेत पाठवले. मृत गायींच्या दफनाची प्रक्रिया पोलिस विभागाच्या देखरेखीखाली सुरू आहे.’’