म्हाडाच्या १५० दुकानांचा ऑगस्टमध्ये ई-लिलाव

म्हाडाच्या १५० दुकानांचा ऑगस्टमध्ये ई-लिलाव
बिंबिसार नगरातील १४ कोटींच्या गाळ्याचा समावेश

सकाळ वृत्तसेवा
मुंबई, ता. २२ : म्हाडा आता सर्वसामान्यांना घरांसोबत व्यावसायिकांनाही मदतीचा हात देत आहे. त्यानुसार मुंबई शहर आणि उपनगरांतील तब्बल १४९ व्यावसायिक गाळ्यांच्या विक्रीसाठी म्हाडाकडून ई-लिलाव केला जाणार आहे. त्यामुळे गरजू व्यावसायिकांना हे गाळे ई-लाॅटरीद्वारे विकले जाणार असून, त्यासाठी ऑगस्टमध्ये जाहिरात काढली जाणार आहे. या गाळ्यांची आधारभूत किंमत सुमारे २०० कोटींच्या घरात आहे.
मुंबईत घरांच्या किमती गगणाला भिडलेल्या असतानाच व्यावसायिक गाळे खरेदी करणे आवाक्याबाहेर आहे. त्यामुळे म्हाडाने आता आपल्या निवासी इमारतीच्या ठिकाणी तयार होणारे काही गाळे लिलावाद्वारे विकण्याचा निर्णय घेतला आहेत. त्यानुसार ऑगस्टमध्ये १४९ व्यावसायिक गाळ्यांचा ई-लिलाव केला जाणार असून, त्याचा प्रस्ताव मंजुरीसाठी म्हाडाच्या उपाध्यक्षांकडे पाठविण्यात आला आहे. हे गाळे पवई, मालवणी, प्रतीक्षानगर, महावीरनगर, गोरेगाव, बिंबिसारनगर, चुनाभट्टी, विक्रोळी अशा विविध ठिकाणी असल्याची माहिती म्हाडाच्या एका वरिष्ठ अधिकाऱ्याने दिली.

गाळ्याच्या आरक्षणात बदल
म्हाडाने मागील वर्षी काढलेल्या गाळ्यांच्या ई-लिलावामध्ये बिंबिसारनगरातील बँकेसाठी राखीव असलेल्या चार हजार चौरस फुटांच्या गाळ्याचा समावेश होता. मात्र केवळ राखीव असल्याने त्या गाळ्याची विक्री होऊ शकली नव्हती. त्यामुळे म्हाडाने आता या गाळ्याची विक्री व्हावी, म्हणून त्याचे असलेले आरक्षण रद्द करण्याच्या हालचाली सुरू केल्या आहेत. तसेच इतरही व्यावसायिक गाळ्यांवर ठरावीक व्यवसायासाठी राखीव म्हणून असलेले आरक्षण काढून खुल्या पद्धतीने विक्री करण्याचा विचार आहे.