फूड स्टॉल्सची विद्युत सुरक्षा तपासणार

फूड स्टॉल्सची विद्युत सुरक्षा तपासणार
आगीच्या घटना लक्षात घेऊन पश्चिम रेल्वेचा निर्णय

सकाळ वृत्तसेवा
मुंबई, ता. २२ : स्थानक परिसरातील फूड स्टॉल्समध्ये अलीकडे घडलेल्या आगीच्या घटनांच्या पार्श्वभूमीवर खबरदारीचा उपाय म्हणून पश्चिम रेल्वेने उपनगरीय स्थानकांवरील सर्व खाद्यपदार्थ विक्री केंद्रांची विद्युत तपासणी करण्याचा निर्णय घेतला आहे.

चर्चगेट स्थानकावरील एका फूड स्टॉलमध्ये आग लागल्याची घटना नुकतीच घडली होती. तसेच दुसऱ्या घटनेत एक्झॉस्ट फॅन अति उष्ण झाल्याने धूर निघाल्याचे निदर्शनास आले. दोन्ही घटनांमध्ये विद्युत उपकरणांतील बिघाड कारणीभूत ठरल्याचे समोर आले आहे. या पार्श्वभूमीवर पश्चिम रेल्वेचे महाव्यवस्थापक विवेक गुप्ता यांनी चर्चगेट स्थानकाची पाहणी केली. त्यानंतर त्यांनी अधिकाऱ्यांना स्थानक परिसराचे सखोल विद्युत ऑडिट करण्याचे निर्देश दिले. पश्चिम रेल्वेच्या चर्चगेट ते डहाणूदरम्यानच्या सर्व उपनगरीय स्थानकांवरील फूड स्टॉल्सची तपासणी केली जाणार आहे. स्टॉल्समध्ये वापरल्या जाणाऱ्या विद्युत उपकरणांची आणि जोडणीची पाहणी करून ती विद्युत सुरक्षेच्या नियमांनुसार आहेत की नाही, याची खात्री केली जाणार आहे. लहान स्थानकांवरील स्टॉल्सची तपासणी दरमहिन्याला, तर प्रमुख स्थानकांवरील स्टॉल्सची दर तीन महिन्यांनी केली जाणार आहे.

..
सुरक्षेच्या दृष्टीने प्रशासनाचे आवाहन
काही स्टॉलधारकांकडून परवानगीपेक्षा अधिक विद्युत भार घेतला जात असल्याचेही निदर्शनास आले आहे. त्यामुळे त्यांना अधिकृत विद्युत भार वाढवून घेण्याचा सल्ला रेल्वे प्रशासनाने दिला आहे. तसेच स्टॉल बंद असताना त्याचा मुख्य पॉवर स्विच बंद ठेवण्याचेही निर्देश देण्यात आले आहेत. रेल्वे स्थानकांवरील सुरक्षेच्या दृष्टीने हा निर्णय महत्त्वाचा ठरणार असल्याचे रेल्वे प्रशासनाकडून स्पष्ट करण्यात आले आहे.