महिलांना मिळाली रोजगाराची संधी

बदलापूर, ता. २२ (बातमीदार) : उपमुख्यमंत्री तथा अर्थमंत्री अजित पवार यांच्या वाढदिवसानिमित्त राष्ट्रवादी काँग्रेस बदलापूर यांच्या माध्यमातून विविध सामाजिक उपक्रम राबवण्यात आले होते. या वेळी प्रदेश सरचिटणीस तथा परशुराम आर्थिक विकास महामंडळाचे अध्यक्ष कॅप्टन आशीष दामले यांच्या माध्यमातून महिलांना रोजगार मिळावा या उद्देशाने शिलाई मशीनचे वाटप करण्यात आले.
आर्थिकदृष्ट्या घरातील महिलेचे सबलीकरण करण्यासाठी आणि महागाईत गृहिणींनाही रोजगार उपलब्ध व्हावा, या उद्देशाने उपमुख्यमंत्री अजित पवार यांच्या वाढदिवसाचे औचित्य साधून बदलापूर शहरात अनंत भवन येथे गरजू महिलांना शिलाई मशीनचे वाटप केले. या वेळी चांगल्या दर्जाच्या आणि अद्ययावत शिलाई मशीन वाटप केल्या. या माध्यमातून शिलाई कामातून चार पैसे कमावून महिला स्वावलंबी आणि आपल्या कुटुंबाचा आधार होऊ शकतील. त्याचबरोबर बदलापूर शहरातील ग्रामीण वस्तीमधील, इतर आदिवासी मुलांना खाऊचे वाटप करण्यात आले. या उपक्रमाला राष्ट्रवादीचे शहराध्यक्ष प्रभाकर पाटील, ठाणे ग्रामीण युवती अध्यक्षा प्रियांका दामले, अनेक पदाधिकारी, कार्यकर्ते उपस्थित होते.

उपमुख्यमंत्री अजित पवार आदर्शवत व्यक्तिमत्त्व आहेत. त्यांच्याकडून राजकारणापेक्षाही समाजकार्य कसे करता येईल, याचे धडे गिरवले आहेत. स्पष्टवक्तेपणा आणि वेळेची किंमत ओळखून काम करणाऱ्या नेत्याचा वाढदिवस म्हणजे ऊर्जा देणारा दिवस आहे. यासाठी हा वाढदिवस सामाजिक उपक्रम राबवून साजरा करण्याचे ठरवले. यापुढेही समाजासाठी जे करता येईल ते करत चांगले राजकारण करण्याचा मानस आहे.
- आशीष दामले, प्रदेश सरचिटणीस, राष्ट्रवादी,
परशुराम आर्थिक विकास महामंडळ (अध्यक्ष)