डोंबिवलीत ठाकरे गटाला गळती

डोंबिवलीत ठाकरे गटाला गळती
युवासेना जिल्हा अधिकाऱ्याचा राजीनामा

सकाळ वृत्तसेवा
डोंबिवली, ता. २२ ः शिवसेना ठाकरे गटाला डोंबिवलीत गळती लागली आहे. पक्षातील अंतर्गत गटबाजीला कंटाळून कल्याण लोकसभेचे युवासेना जिल्हाधिकारी प्रतीक पाटील यांनी राजीनामा देत पक्षाला सोडचिठ्ठी दिली आहे. शिवसेनेचे नेते तथा युवासेना प्रमुख आदित्य ठाकरे यांना पत्रव्यवहार करत पाटील यांनी आपल्या पदाचा आणि पक्ष सदस्यत्वाचा राजीनामा दिला आहे.
यापूर्वी ज्येष्ठ पदाधिकारी सदानंद थरवळ यांनीदेखील निष्ठावंतांना डावलले गेल्याने नाराज होत विधानसभा निवडणुकीच्या तोंडावर पक्षाला रामराम ठोकला होता. पालिका निवडणुका जवळ आल्या असताना आता पक्षातील वरिष्ठांकडून सापत्न वागणूक मिळत असल्याचे कारण देत युवासेना जिल्हा अधिकारी आणि त्यांच्यासोबतच सहा पदाधिकाऱ्यांनी राजीनामा दिल्याने पक्षातील गळती रोखणे ठाकरे गटापुढे मोठे आव्हान असणार आहे.
कल्याण लोकसभा क्षेत्रात जिल्हाप्रमुख दीपेश म्हात्रे पक्षाचे सर्वेसर्वा झाल्याचे चित्र सध्याच्या घडीला आहे. विरोधी पक्ष म्हणून दीपेश हे चोख भूमिका बजावत असताना पक्षातील अंतर्गत नाराजीचा मात्र त्यांना मोठा फटका बसण्याची शक्यता आहे. कल्याण लोकसभेचे युवासेना जिल्हा अधिकारी प्रतीक पाटील यांनी राजीनामा दिला आहे. प्रतीक यांनी २००७ मध्ये भारतीय विद्यार्थी सेनेचा शाखा संघटक, २०१० मध्ये युवासेना स्थापनेनंतर उपविभाग अधिकारी नंतर तालुका अधिकारी आणि २०२२ पासून कल्याण लोकसभा युवासेना जिल्हा अधिकारी म्हणून काम पाहिले. ‘२०२४ विधानसभा निवडणुकीनंतर मला व माझ्या सहकाऱ्यांना वरिष्ठांकडून सापत्न वागणूक मिळत असून, तसेच संघटनेतील गटबाजीमुळे अत्यंत निराशा आली आहे,’ असे प्रतीक यांनी म्हटले आहे.
...
यांनी दिले राजीनामे
प्रतीक यांच्यासोबत डोंबिवली विधानसभा उपजिल्हा अधिकारी परेश काळन, कल्याण ग्रामीण विधानसभा समन्वयक पंकज माळी, उपतालुका अधिकारी आवेश गायकर, शहर अधिकारी प्रसाद दुकरुल, युवती शहर अधिकारी पायल शिंगोटे, युवर शहर समन्वयक ज्योती पाखरे यांनी राजीनामा दिला आहे.