मुंबई विमानतळ परिसरातील कत्तलखाने, मांसाहारी दुकांनावर बंदी आणा

विमानतळ परिसरातील कत्तलखाने, दुकांनावर बंदी आणा
उच्च न्यायालयाचा सुनावणीस नकार, याचिका निकाली काढली
सकाळ वृत्तसेवा
मुंबई, ता. २२ : मुंबई विमानतळाच्या १० किलोमीटरच्या परिसरात बेकायदा कत्तलखाने, मांसविक्रीच्या दुकानांना प्रतिबंधित करावे आणि विमान वाहतूक सुरक्षा नियम लागू करण्याची मागणी करणारी जनहित याचिका नुकतीच उच्च न्यायालयाने निकाली काढली आहे.
या मुद्द्याशी संबंधित दोन याचिका न्यायप्रविष्ट आहेत. त्यामुळे एकाच प्रश्नाशी संबंधित आणखी एका याचिकेची आवश्यकता नाही, असे याचिका निकाली काढताना मुख्य न्या. आलोक आराधे आणि न्या. संदीप मारणे यांच्या खंडपीठाने नमूद केले.
महात्मा गांधी संस्थापित प्राणी हक्क संघटनेच्या अखिल भारत कृषी गो सेवा संघाने ही जनहित याचिका दाखल केली हाेती. विमानतळांच्या १० किमीच्या परिसरात बेकायदा चालणारे कत्तलखाने, मांसाहारी दुकानांवर देखरेख ठेवण्यासाठी समिती गठित करून त्याबाबत निष्कर्षांचा अहवाल समितीला देण्याची मागणी याचिकेत केली होती.
मुंबई विमानतळाजवळील मांसाहारी दुकाने विमानतळापासून सुमारे २.५ किमी अंतरावर आहेत. २०२४ आणि २०२५मध्ये बकरी ईददरम्यान मुंबई महापालिकेने सुरक्षा नियमांचे उल्लंघन करून परवाने दिल्याचा आरोप याचिकेत केला होता. या दुकानांच्या मालकांविरोधात अनेकदा तक्रारी करूनही ही दुकाने सुरूच आहेत. वारंवार तक्रारी तसेच कायद्याचे, नियमावलींचे उल्लंघन होत असताना पुरावे देऊनही पालिका कारवाई करण्यात अपयशी ठरल्याचा दावाही याचिकेत केला होता. त्यामुळे या प्रतिबंधित क्षेत्रातील दुकाने बंद करण्याचे आणि भविष्यात कोणतेही तात्पुरते किंवा कायमस्वरूपी परवाने देण्यापासून पालिकेला रोखण्याचे आदेश देण्याची मागणी याचिकेत केली होती.