मुलांच्या अपहरणाचा डाव उधळला

मुलांच्या अपहरणाचा डाव उधळला

बोळिंज, ता. २२ (बातमीदार) ः वसईमध्ये तृतीयपंथींच्या वेषात तिघांनी मुलींना पळवण्याचा प्रयत्न केल्याचे लक्षात येताच गावकऱ्यांनी त्यांना चोप देत पोलिसांच्या ताब्यात दिले. वसई पोलिस अधिक तपास करीत आहेत.
मिळालेल्या माहितीनुसार, शाळकरी मुलींचे अपहरण करण्याचा डाव गावकऱ्यांनी उधळवून लावला. ही घटना वसई पश्चिमेच्या खोचिवडे गावातील कुरणवाडी इथे घडली. गावातल्या मुख्य रस्त्यालगत चालत जाणाऱ्या तीन मुलींचे आणि एका मुलाचे अपहरण करण्याच्या प्रयत्न करण्यात आला, असा आरोप गावकऱ्यांनी केला आहे. तृतीयपंथींचा वेश घेऊन काही जण गावात आले होते. त्यांच्यासोबत एक रिक्षाचालकही होता. मुलांना चाकूचा धाक दाखवण्यात आला. शिवाय रस्त्यात अडवून पळवण्याचा प्रयत्न केला. मुलांनी आरडाओरडा केल्याने गावकरी सावध झाले. त्यांनी त्या मुलांच्या दिशेने धाव घेतली आणि त्या तीन जणांच्या तावडीतून त्या लहान मुलींची सुटका केली.