माथाडी नेत्यांमध्ये रंगला कलगीतुरा

माथाडी नेत्यांमध्ये रंगला कलगीतुरा

वाशी, ता. २२ (बातमीदार) ः एपीएमसी आवारातील वाहनतळाच्या मुद्द्यावर राष्ट्र‌वादी काँग्रेस शरद पवार गटाचे नवनिर्वाचित प्रदेशाध्यक्ष शशिकांत शिंदे आणि अण्णासाहेब पाटील आर्थिक विकास महामंडळाचे अध्यक्ष नरेंद्र पाटील या दोन माथाडी कामगार नेत्यांमध्ये चांगलाच कलगीतुरा रंगला. माथाडी भवन येथील सत्कार सोहळ्यात या दोन नेत्यांची जुंपली.
माथाडी संघटनेच्या वतीने राष्ट्रवादी काँग्रेस शरद पवार गटाच्या प्रदेशाध्यक्षपदी नेमणूक झाल्याबद्दल शशिकांत शिंदे व भायखळा येथील शिवसेनेचे आमदार मनोज जामसुतकर यांचा सत्कार मंगळवारी (ता. २२) माथाडी भवन येथे आयोजित करण्यात आला होता. या वेळी माथाडी भवनात रंगलेल्या या सोहळ्यात नरेंद्र पाटील भाषण करीत असताना ट्रक टर्मिनलच्या जागेवर सिडकोमार्फत उभारलेल्या आलिशान गृहसंकुलाचा मुद्दा उपस्थित झाला. त्याचप्रमाणे एपीएमसी स्थलांतरित होण्याच्या मुद्द्यावर चर्चा झाली. या वेळी नरेंद्र पाटील यांचे भाषण रोखून शशिकांत शिंदे यांनी निवडणुकीसाठी फंड गोळा करण्यासाठी एपीएमसीतील जागेवर गृहसंकुल उभारण्यात आले का, असा सवाल करीत भाजपवर जोरदार टीका केली. नरेंद्र पाटील यांनी मी काही मुद्दा उपस्थित केल्यांनतर शिंदे तो स्वतःहून अंगावर ओढून घेत असल्याचे स्पष्ट केले. सरकारच्या विरोधात सातत्याने बोलून टीका होत राहिली तर सरकारकडून होणारे काम रोखण्यात येईल, अशी भीती वाटत असल्याचे पाटील या वेळी म्हणाले.