स्मारकाशेजारील अनधिकृत टपरी

स्मारकाशेजारील अनधिकृत टपरी
निष्कासन कारवाईसाठी तक्रारदार बसणार उपोषणाला

कल्याण, ता. २२ (वार्ताहर) : कल्याण पूर्वेतील काटेमानिवली परिसरात प्रभाग ५/ड कार्यालयाच्या शेजारी, खासदार डॉ. श्रीकांत शिंदे यांच्या प्रयत्नातून उभारण्यात आलेल्या २१ कोटींच्या डॉ. बाबासाहेब आंबेडकर स्मारकाजवळ एका खासगी संस्थेने कोणतीही अधिकृत परवानगी न घेता कच्च्या स्वरूपाचे कार्यालय उभारले आहे. या अनधिकृत बांधकामाविरोधात तक्रारदार विनोद तिवारी यांनी महानगरपालिकेकडे तक्रार दाखल केली होती.

तक्रारीच्या अनुषंगाने कल्याण-डोंबिवली महापालिकेच्या प्रभाग ५/ड चे सहाय्यक आयुक्त उमेश यमगर यांनी महाराष्ट्र महापालिका अधिनियमाच्या कलम २६०(२) व ४७८ अंतर्गत संस्थेला कायदेशीर नोटीस बजावली. या नोटीसमध्ये संबंधितांना १८ जुलैपर्यंत हे बांधकाम स्वतःहून हटवण्याचे आदेश देण्यात आले होते; मात्र मुदत संपूनही महापालिकेकडून कोणतीही प्रत्यक्ष कारवाई न झाल्याने तक्रारदार तिवारी यांनी बेमुदत उपोषणाचा इशारा दिला आहे.

विनोद तिवारी हे २४ जुलैपासून प्रभाग ५/ड कार्यालयासमोर उपोषणाला बसणार असून, त्यांनी यासंदर्भात लेखी पत्र प्रभाग कार्यालय व कोळसेवाडी पोलिस ठाण्यात सादर केले आहे. विशेष म्हणजे, या बेकायदा टपरीस महाराष्ट्र राज्य महावितरण कंपनीने कोणतीही शहानिशा न करता ९ जुलै रोजी वीजजोडणी दिली आहे, असा गंभीर आरोपही तिवारी यांनी केला आहे. स्मारकाच्या परिसरात कोणतेही अतिक्रमण असू नये आणि तातडीने संबंधितांवर कारवाई करण्यात यावी अन्यथा हे उपोषण अधिक व्यापक स्वरूप धारण करू शकते, असा इशारा तिवारी यांनी दिला.