कल्याण अवती-भवती

जिल्हाधिकाऱ्यांच्या हस्ते संगणक, टॅबवाटप
कल्याण (वार्ताहर) : ठाणे जिल्हाधिकारी अशोक शिनगारे यांनी आज कल्याण तालुक्याचा दौरा केला. उपविभागीय अधिकारी कार्यालयात झालेल्या एका विशेष कार्यक्रमात, आय.डी.बी.आय. बँक लिमिटेडच्या सी.एस.आर. निधीतून कल्याण तालुक्यातील काही शाळांना आणि शासकीय रुग्णालयांना संगणक, प्रिंटर व टॅब्स वितरित करण्यात आले. जिल्हाधिकाऱ्यांनी बँकेमार्फत राबविण्यात येणाऱ्या सामाजिक उपक्रमांचे विशेष कौतुक करीत संस्थेच्या सामाजिक भानाची प्रशंसा केली. या कार्यक्रमाला जिल्हा परिषदेचे मुख्य कार्यकारी अधिकारी रोहन घुगे, अपर जिल्हाधिकारी हरीश पाटील, पोलिस उपायुक्त अतुल झेंडे, उपविभागीय अधिकारी विश्वास गुजर, आय.डी.बी.आय. बँकेचे मुख्य व्यवस्थापक रंजनकुमार रथ, ठाणे विभाग व्यवस्थापक रंजन कन्हैया आदी उपस्थित होते. या वेळी जिल्हाधिकाऱ्यांनी उपविभागीय अधिकारी कार्यालयाच्या नूतनीकरणाची पाहणी करून समाधान व्यक्त केले. अधिकारी-कर्मचाऱ्यांच्या कामकाजाचे कौतुक करीत त्यांनी जनतेच्या सेवेसाठी सातत्याने कार्यरत राहण्याच्या शुभेच्छा दिल्या. कार्यक्रमाच्या निमित्ताने कार्यालयाच्या परिसरात वृक्षारोपणदेखील करण्यात आले. यानंतर मान्यवरांनी कल्याण तहसील कार्यालयालाही भेट दिली.
.......................
ह प्रभागात अनधिकृत चाळींवर धडक कारवाई
कल्याण (वार्ताहर) : कल्याण-डोंबिवली महापालिकेच्या ह प्रभाग क्षेत्रात अनधिकृतपणे सुरू असलेल्या चाळींविरोधात मंगळवारी धडक तोडक कारवाई करण्यात आली. या कारवाईत १० अनधिकृत खोल्यांचे बांधकाम निष्कासित करण्यात आले. ही कारवाई महापालिका आयुक्त अभिनव गोयल यांच्या निर्देशानुसार, अतिरिक्त आयुक्त योगेश गोडसे यांच्या मार्गदर्शनाखाली आणि ह प्रभागाचे सहाय्यक आयुक्त राजेश सावंत यांच्या नेतृत्वाखाली पार पडली. डोंबिवली (पश्चिम) येथील कुंभारखाणपाडा, सरोवरनगर परिसरात ही अतिक्रमणविरोधी मोहीम राबविण्यात आली. कारवाईदरम्यान अधीक्षक अरुण पाटील, फेरीवाला पथकाचे कर्मचारी, ठेकेदाराचे १० कामगार सहभागी होते. महापालिकेच्या या कारवाईमुळे अनधिकृत बांधकाम करणाऱ्या चाळमाफियांमध्ये खळबळ उडाली असून, प्रशासनाच्या कडक भूमिकेमुळे भविष्यात अतिक्रमण रोखण्यास मदत होणार असल्याचे संकेत मिळत आहेत.
....................