दुप्पट परताव्याच्या प्रलोभनाने ३१ लाखांचा गंडा

दुप्पट परताव्याच्या प्रलोभनाने ३१ लाखांचा गंडा
उल्हासनगरमध्ये महिलेची ऑनलाइन फसवणूक
उल्हासनगर, ता. २३ (वार्ताहर) : दुप्पट परताव्याचे प्रलोभन दाखवत एका महिलेची तब्बल ३१ लाख २७ हजार रुपयांची ऑनलाइन फसवणूक करण्यात आली आहे. बनावट ट्रेडिंग अ‍ॅपच्या माध्यमातून अज्ञात आरोपीने महिलेला गुंतवणुकीस प्रवृत्त करून पैसे उकळले. शेवटी आणखी १० लाख रुपयांची शुल्क मागणी केल्यावर फसवणूक झाल्याची जाणीव होताच महिलेने उल्हासनगर पोलिस ठाण्यात धाव घेत गुन्हा दाखल केला आहे.

महिलेला व्हॉट्सअ‍ॅपवरून गुंतवणुकीचा संदेश आला होता. त्यामधून तिला एक लिंक पाठवून अ‍ॅप डाऊनलोड करण्यास सांगण्यात आले. आरोपीने स्वतःला अ‍ॅपचा मॅनेजर असल्याचे सांगून तिचा विश्वास संपादन केला. सुरुवातीला थोडासा परतावा दाखवत टप्प्याटप्प्याने महिलेकडून विविध बँक खात्यांमध्ये एकूण ३१ लाख २७ हजारांची रक्कम भरून घेतली; मात्र गुंतवलेले पैसे परत मागितल्यावर आरोपीने टाळाटाळ करीत आणखी १० लाख रुपयांच्या शुल्काची मागणी केली. या प्रकारामुळे महिलेला आपली फसवणूक झाल्याची जाणीव झाली. याप्रकरणी अज्ञात आरोपीविरोधात फसवणुकीचा गुन्हा दाखल करण्यात आला असून सायबर गुन्हे विभागाच्या साहाय्याने तपास सुरू आहे. सायबर गुन्ह्यांबाबत नागरिकांनी सतर्क राहावे, कोणत्याही अनोळखी लिंकवर क्लिक करू नये, मोबाईलवरून बिनधास्त पैसे ट्रान्स्फर करू नयेत, असा इशारा पोलिसांकडून देण्यात आला आहे.

नागरिकांना आवाहन
अनोळखी गुंतवणूक लिंक टाळा
अधिकृत व शासकीय प्लॅटफॉर्मवरच व्यवहार करा
शंका आल्यास त्वरित पोलिसांशी संपर्क साधा

ऑनलाइन गुंतवणुकीच्या नावाखाली सावज शोधणाऱ्या सायबर गुन्हेगारांचे जाळे दिवसेंदिवस गुंतागुंतीचे होत आहे. तांत्रिक विश्लेषणाच्या मदतीने लवकरच आरोपींचा शोध घेतला जाईल. नागरिकांनी सावधगिरी बाळगणे अत्यंत गरजेचे आहे.
- सचिन गोरे, पोलिस उपायुक्त, परिमंडळ चार, उल्हासनगर