भिंत कोसळून तिघेजण जखमी

घाटकोपर, ता. २३ (बातमीदार)ः आठवडाभरापासून संततधार पाऊस कोसळत आहे. याचा फटका डोंगरावरील घरांना बसून, दरड कोसळण्याच्या दुर्घटना घडत आहेत. मंगळवारी रात्री भांडुपमध्ये दोन ठिकाणी, तर खिंडीपाडा भागात डोंगरावरील पाच घरे ५० फुटांवरून खाली कोसळली, तर दुसऱ्या घटनेत पंजाबी चाळीत घराची भिंत कोसळून तिघे जण जखमी झाल्याची माहिती आहे. खिंडीपाडा भागात दरड कोसळून पाच घरांचे नुकसान झाले, मात्र सुदैवाने कोणतीही जीवितहानी झाली नाही. ओमेगा हायस्कूलच्या मागे ही घटना घडली. दरड संरक्षक भिंतीसह सुमारे ५० ते ५५ फूट खाली आल्याने पाच घरांचे नुकसान झाले, तर दुसऱ्या घटनेत पश्चिमेतील पंजाबी चाळीत घराची भिंत कोसळून तिघे जखमी झाले. त्यात एका वृद्ध महिलेचा आणि दोन मुलांचा समावेश आहे. जखमींवर रुग्णालयात उपचार सुरू असून, प्रकृती स्थिर आहे. दरम्यान, घटनेची माहिती मिळताच अग्निशमन दल, पालिका अधिकारी तसेच पोलिस घटनास्थळी दाखल झाले होते.
-------------------------------------------------------
धोक्याची टांगती तलवार
या घटनेमुळे आता भांडुपच्या डोंगराळ परिसरात रहिवाशांमध्ये भीतीचे वातावरण निर्माण झाले आहे. गेल्या काही वर्षांपासून पालिका अशा दरड कोसळण्याची भीती असलेल्या विभागातील रहिवाशांना घरे खाली करून इतरत्र जाण्याचे आवाहन करते, मात्र अनेक रहिवासी जीवावर उदार होऊन त्याच ठिकाणी राहात आहेत. त्यामुळे धोक्याची टांगती तलवार कायम आहे.