कर्जतमधील सुशोभीकरण स्तंभाला नागरिकांचा विरोध

कर्जतमधील सुशोभीकरण स्तंभाला नागरिकांचा विरोध
हटवण्यासाठी बांधकाम विभागाच्या मंत्र्यांकडे भाजप नेत्यांचे निवेदन
कर्जत, ता. २३ (बातमीदार) ः कर्जत चारफाटा येथे सार्वजनिक बांधकाम विभागाकडून सुरू असलेल्या सुशोभीकरण स्तंभांच्या कामावर आता प्रश्नचिन्ह उभे राहिले आहे. हे काम अनावश्यक असून, भविष्यात रेल्वे पुलाच्या विस्तारीकरणासाठी अडथळा ठरणार असल्याचा मुद्दा उपस्थित करत भाजपचे विधानसभा प्रमुख किरण ठाकरे यांनी थेट सार्वजनिक बांधकाम मंत्री शिवेंद्रराजे भोसले यांना पत्र लिहून हा स्तंभ रद्द करण्याची मागणी केली आहे.
कर्जत शहरात सध्या मोठ्या प्रमाणावर वाहतूक कोंडी निर्माण होत आहे. विशेषतः चारफाटा परिसरात सुट्टीच्या दिवशी किंवा पर्यटकांच्या गर्दीच्या वेळी नागरिकांना घराबाहेर पडणेही अवघड बनले आहे. वाहतूक कोंडी आणि वळणावर अडथळा नको म्हणून याच ठिकाणी असणाऱ्या स्थानिकांच्या टपऱ्या हटवण्यात आल्या होत्या; मात्र सुशोभीकरण स्तंभाचा बराचसा भाग हा रस्त्यावर असून, वळणावर अडथळा ठरत आहे. चारफाट्याजवळील रेल्वे पूल हा कर्जत शहराशी जोडणारा मुख्य दुवा आहे. भविष्यात वाढत्या वाहतुकीचा विचार करता या पुलाचे रुंदीकरण करणे अत्यावश्यक आहे, मात्र सद्यःस्थितीत सार्वजनिक बांधकाम विभागाकडून परिसरात दोन्ही बाजूंनी उभारण्यात येत असलेले आरसीसी सुशोभीकरण स्तंभ हे या विस्तारीकरणात मोठा अडथळा ठरणार असल्याची स्पष्ट शक्यता आहे. या स्तंभांचे काम नागरिकांच्या कोणत्याही मागणीशिवाय सुरू असल्याने निधीचा अनावश्यक अपव्यय होत आहे. कर्जत शहरातील वाहतूक कोंडीची समस्या गंभीर स्वरूप धारण करत असल्याने ठाकरे यांनी मंत्री स्तरावरून तातडीने निर्णय घेऊन नागरिकांच्या सुरक्षिततेसाठी आवश्यक पावले उचलावीत, अशी अपेक्षा व्यक्त केली आहे.
.............
वाहतूक कोंडीची समस्या
किरण ठाकरे यांनी आपल्या पत्रात नमूद केले आहे की, याच सुशोभीकरणाच्या कामामुळे काही दिवसांपूर्वी एक मोठा अपघात घडला होता. वाहनचालकाचा ताबा सुटल्याने टेम्पो थेट सुरू असलेल्या आरसीसी स्तंभाला धडकला होता. त्यामुळे या स्तंभांचे स्थान केवळ अडथळा ठरणारेच नाही, तर अपघाताचेही कारण ठरू शकते. कर्जत शहरात मोठे रुग्णालय नसल्याने गंभीर रुग्णांना पनवेल किंवा नवी मुंबई येथे हलवावे लागते, मात्र चारफाट्यावरील वाहतूक कोंडीमुळे रुग्णवाहिकांना वेळेत पोहोचता येत नाही आणि काही प्रकरणांमध्ये रुग्णांचा मृत्यू होण्याची घटना घडली असल्याचे ठाकरे यांनी पत्रात नमूद केले आहे.