पदोन्नतीनंतरही कर्मचाऱ्यांची नकार घंटा

पदोन्नतीनंतरही कर्मचाऱ्यांची नकारघंटा
ठाणे पालिकेच्या कर्मचाऱ्यांची नाराजी
सकाळ वृत्तसेवा
ठाणे, ता. २३ : ठाणे पालिका सेवेतील कर्मचारी व अधिकारी मोठ्या प्रमाणात सेवानिवृत्त आहेत. त्यामुळे अधिकारी व कर्मचारी यांची वानवा निर्माण झाली आहे. तर, दुसरीकडे मागील ३० वर्षे पालिकेत पदोन्नतीचा मार्ग रखडला होता. त्यानंतर वरिष्ठ लिपिक ते उपअधीक्षकपदी ५४ आणि ४९ लिपिकांना वरीष्ठ लिपिकपदी पदोन्नती देऊनही त्यांना नवीन कार्यभार मिळू शकला नव्हता. त्यानंतर आता ठाणे पालिकेच्या आस्थापना विभागाकडून पदोन्नतीने पदस्थापना केली आहे; मात्र पदोन्नती मिळाल्यानंतरही या कर्मचाऱ्यांच्या विविध विभागात बदल्या केल्या आहेत, त्यामुळे काही कर्मचाऱ्यांमध्ये नाराजी व्यक्त करीत बदलीच्या ठिकाणी हजर राहण्यास थेट नकार दिला आहे.
ठाणे पालिका सेवेतून निवृत्त होणारे कर्मचारी, त्यात रखडलेली भरती प्रक्रिया यांमुळे सध्याच्या घडीला कार्यरत असलेल्या कर्मचाऱ्यांवर कामाचा ताण वाढत आहे. अशातच ठाणे पालिकेने आतापर्यंत १५८ हून अधिक जणांना पदोन्नती दिली आहे.
दरम्यान, यासंदर्भात ठाणे पालिकेच्या आस्थापना विभागाचे उपायुक्त गजानन गोदापुरे यांना विचारले असता, काही तांत्रिक अडचणीमुळे कर्मचाऱ्यांची पदोन्नतीने पदस्थापना करता येणे शक्य नव्हते; परंतु आता अडचणी दूर करून पदोन्नती झालेल्या कर्मचाऱ्यांची पदस्थापना करण्यात आली असल्याचे त्यांनी या वेळी सांगितले.
----------------------------
पूर्वीचेच काम
मागील महिन्यात ठाणे महापालिकेने लिपिकपदी काम करीत असलेल्या ४९ जणांना वरीष्ठ लिपिकपदी पदोन्नती दिली. शिवाय, वरिष्ठ लिपिक ते उपअधीक्षक पदावर ५६ जणांना पदोन्नती देण्यात आली आहे; परंतु त्यांची ही पदोन्नती मिळाल्यानंतरही मागील महिनाभरापासून १०५ जणांना पूर्वीचेच काम करावे लागत होते; मात्र नुकतेच या सर्व १०५ कर्मचाऱ्यांना पदोन्नती पदस्थापना करण्यात आली आहे. तसेच, ज्या-ज्या विभागात जागा रिक्त आहेत, त्या ठिकाणी त्यांना तत्काळ हजर राहण्यास सांगण्यात आले.
---------------------------------------
कर्मचाऱ्यांची नकारघंटा
पदोन्नती मिळाल्यानंतर दिलेल्या पदावर काम करण्यास कर्मचाऱ्यांमध्ये आनंदाचे वातावरण पसरले आहे. तर मागील कित्येक वर्षे २० ते २५ वर्षे एकाच विभागात काम करणाऱ्या कर्मचाऱ्यांनी बदलीच्या ठिकाणी जाण्यास नकारघंटा वाजविली असल्याची माहितीही समोर आली आहे. काहींनी पदोन्नतीदेखील नकोच अशीच काहीशी मागणीदेखील केल्याची माहिती समोर आली आहे.
-------------------------