विद्याभवनमध्ये लो. टिळक जयंती साजरी

विद्याभवनमध्ये लोकमान्य टिळक जयंती साजरी
नेरूळ, ता. २३ (बातमीदार) ः पुणे विद्यार्थी गृहाच्या नेरूळ येथील शिक्षण संकुलात लोकमान्य टिळक जयंती उत्साहात साजरी करण्यात आली. मुख्य समन्वयक, माजी मुख्याध्यापक पांडुरंग मुळीक यांच्या प्रमुख उपस्थितीत हा कार्यक्रम पार पडला.
लोकमान्य टिळकांचा करारीपणा आणि अभ्यासू वृत्ती विद्यार्थ्यांनी आत्मसात करावी, असे मत समन्वयक माजी मुख्याध्यापक आणि समन्वयक पांडुरंग मुळीक यांनी व्यक्त केले. लोकमान्य टिळकांचा निग्रहीपणा, अभ्यासू वृत्ती, स्पष्टवक्तेपणा, प्रामाणिकपणा, लेखन कौशल्य, नेतृत्त्व, राजकीय व सामाजिक विचार यावर विद्यार्थी आणि शिक्षकांनी आपले विचार व्यक्त केले. गीतारहस्य, मंडालेचा तुरुंगवास, केसरी व मराठा वृत्तपत्रे, प्रकाशित अग्रलेख, गणेशोत्सव व शिवजयंती उत्सव सुरुवात आदी घटनांचा उल्लेख विद्यार्थ्यांनी आपल्या भाषणातून व्यक्त केला. या कार्यक्रमास मुख्याध्यापक गोरख कदम, श्रीजा नायर, ज्येष्ठ शिक्षिका राजकुमारी इंदलकर, जयश्री तिपायले, आदर्श शिक्षक अविनाश कुलकर्णी, दत्तात्रय आटपाडकर, जगन्नाथ कोळी आणि विद्यार्थी उपस्थित होते.