घोडबंदर कलारसिकांना हवे नाट्यगृह

घोडबंदर कलारसिकांना हवे नाट्यगृह
परिवहनमंत्री सरनाईक यांची मागणी
सकाळ वृत्तसेवा
ठाणे, ता. २३ : राम गणेश गडकरी रंगायतन, डॉ. काशिनाथ घाणेकर नाट्यगृहांमुळे ठाण्याच्या कलावैभवात भर पडली आहे, पण आता नवीन ठाणे म्हणून ओळखल्या जाणाऱ्या आणि झपाट्याने नागरीकरण झालेल्या घोडबंदर परिसरातही एखादे नाट्यगृह असावे, अशी मागणी जोर धरू लागली आहे. त्यासाठी ओवळा-माजिवडाचे स्थानिक आमदार तथा परिवहनमंत्री प्रताप सरनाईक यांनी पुढाकार घेतला आहे. त्यांनी यासंदर्भात पालिका आयुक्त सौरभ राव यांना पत्र लिहिले असून, घोडबंदर परिसरात नवीन नाट्यगृह उभारणे आणि त्यासाठी निधी उपलब्ध करून देण्याची मागणी केली आहे.

गडकरी रंगायतनाच्या रूपाने ठाणेकरांना पहिले हक्काचे नाट्यगृह मिळाले. मासुंदा तलावाजवळ असलेले हे नाट्यगृह म्हणजे ठाण्याचे मानबिंदू मानले जाते. त्यानंतर पोखरण रोड येथे दुसरे भव्य असे डॉ. काशिनाथ घाणेकर नाट्यगृह बांधण्यात आले. ही दोन्ही नाट्यगृहे गेल्या काही वर्षांपासून दुरुस्तीच्या फेऱ्यात अडकली असली तरी नाट्य क्षेत्र आणि कला क्षेत्रासाठी ते आजही पहिल्या पसंतीचे आहे, पण घोडबंदरवासीयांसाठी ही दोन्ही नाट्यगृहांचे अंतर लांब पडते.

वास्तविक घोडबंदर भागाची लोकसंख्या आता वाढली आहे. मोठ्या प्रमाणात येथे नागरीकरण झाले आहे. अनेक सोयीसुविधा येथे उभ्या राहात आहेत. यामध्ये नाट्यगृहाची कमतरता भासत आहे. आजच्या घडीला घोडबंदरवासीयांना किंवा कलाप्रेमींना सांस्कृतिक कार्यक्रम, कला-नाटकाचा आस्वाद घ्यायचा असेल, तर त्यांना शहराच्या दुसऱ्या टोकापर्यंत जावे लागत आहे. त्यामुळे येथे नाट्यगृह सुरू करण्याची मागणी जोर धरू लागली आहे. याची दखल घेत परिवहनमंत्री प्रताप सरनाईक यांनी पालिका आयुक्तांना घोडबंदर भागात नवीन नाट्यगृह उभारण्यासंदर्भात पत्र लिहिले आहे. मंत्री सरनाईक यांनी मांडलेला प्रस्ताव, मागणी त्यासाठी ते पाठपुरावा करतात आणि ते काम मार्गी लावतात, असा आतापर्यंतचा अनुभव आहे. त्यामुळे येत्या काळात घोडबंदर भागातही तिसरी घंटा वाजणार, अशी अपेक्षा केली जात आहे.

कावेसर सुविधा भूखंडावर नाट्यगृह
घोडबंदर परिसरातील मौजे कावेसर येथील विकास प्रस्तावअंतर्गत सात हजार ३४३.३२ चौरस मीटर सुविधा भूखंड प्राप्त होणार आहे. या सुविधा भूखंडावर हे नवीन नाट्यगृह उभारण्यास मंजुरी देऊन निधी उपलब्ध करून देण्याचे निर्देश देण्यात यावेत, अशी सूचना मंत्री प्रताप सरनाईक यांनी पालिका आयुक्त सौरभ राव यांना केली आहे.

.......................