कर्तव्यात कसूर ग्रामपंचायत अधिकाऱ्यांना भोवले

कर्तव्यात कसूर ग्रामपंचायत अधिकाऱ्यांना भोवली
दोघांवर शिस्तभंगाची कारवाई
सकाळ वृत्तसेवा
ठाणे, ता. २३ : ग्रामपंचायतीतील प्रशासनात हलगर्जी आणि जबाबदारीत कसूर केल्यामुळे मुरबाड तालुक्यातील पऱ्हे आणि न्हावे ग्रामपंचायत कार्यालयातील दोन अधिकाऱ्यांवर थेट शिस्तभंगाची कारवाई करण्यात आली आहे. ठाणे जिल्हा परिषदेचे मुख्य कार्यकारी अधिकारी रोहन घुगे यांच्या अचानक भेटीत विविध गंभीर त्रुटी आढळून आल्याने ही कारवाई झाली.

ठाणे जिल्हा परिषदेचे मुख्य कार्यकारी अधिकारी रोहन घुगे यांनी मुरबाड तालुक्यातील पऱ्हे व न्हावे या ग्रामपंचायतींना भेट दिली. या वेळी ग्रामपंचायत कामांचे मोजमाप पुस्तिका, बँक पासबुक, वसुली मस्टर, पावती पुस्तके इत्यादी अभिलेख दप्तरी उपलब्ध नसणे, २०२३-२४ मधील वित्त आयोग व स्वच्छ भारत मिशन योजनेच्या लेखापरीक्षण झालेल्या कामांच्या तीन नस्ती सादर करणे व सदर नस्ती अपूर्ण असणे, ग्रामपंचायतीत संगणक उपलब्ध नसतानादेखील ऑपरेटर व ग्रामपंचायत अधिकारी प्रिंटरवरून कामकाज करत असल्याचे आढळून आले. तसेच निष्काळजीने उत्तर देणे, दाखले दिलेल्याच्या नोंदी ग्रामपंचायत कार्यालयात उपलब्ध नसणे आदी त्रुटी त्यांच्या निदर्शनास आल्या. त्याची गंभीर दखल घेत, ठाणे जिल्हा परिषदेचे मुख्य कार्यकारी अधिकारी यांनी ग्रामपंचायत पऱ्हे येथील ग्रामपंचायत अधिकारी दीपक शिंगाडे व ग्रामपंचायत न्हावे येथील ग्रामपंचायत अधिकारी गजानन काशिनाथ कासार यांच्यावर शिस्तभंगाची कारवाई करण्यात आली असल्याची माहिती जिल्हा परिषद प्रशासनाने दिली.

विकासकामांवर परिणाम
ग्रामीण भागाचा विकास करण्याची जबाबदारी व तेथील नागरिकांना सोयीसुविधा पुरविण्याची जबाबदारी ग्रामपंचायतींवर असते. स्थानिक पातळीवर गावांचा विकास व्हावा, यासाठी राज्य व केंद्र सरकारकडून मिळणारा निधी आता थेट ग्रामपंचायतींच्या खात्यावर वर्ग केला जात आहे. या निधीतून गावांचा विकास करण्यात येत असतो. ग्रामपंचायत स्तरावर सरपंच आणि ग्रामसेवक बैठक घेऊन ठरावदेखील करण्यात येत असतात. असे असताना, अनेक गावांत ग्रामसेवक हजर राहात नसल्याच्या तक्रारी सातत्याने वाढत आहेत. त्याचा परिणाम विकासकामांवर होत असून, अनेक विकासात्मक कामे रखडत असल्याचेदेखील दिसून येत आहे.