जून महिन्यात दिले ऑगस्टचे तिकीट

जून महिन्यात दिले ऑगस्टचे तिकीट
रेल्वे प्रशासनाचा गजब कारभार
सकाळ वृत्तसेवा
डोंबिवली, ता. २३ : डोंबिवली रेल्वेस्थानकात एटीव्हीएम मशीनमधून रेल्वेचे तिकीट काढणाऱ्या एका प्रवाशाला चक्क दोन महिन्यांनंतरच्या तारखेचे तिकीट देण्यात आले. या गोंधळामुळे संबंधित प्रवाशाने रेल्वे प्रशासनाकडे ट्विटद्वारे तक्रार केली आहे; मात्र अद्याप त्याला समाधानकारक उत्तर मिळालेले नाही. त्यामुळे रेल्वेच्या तांत्रिक यंत्रणेवरील प्रश्नचिन्ह उपस्थित होत आहे. त्यामुळे अशाच प्रकारे इतर नागरिकांचीदेखील फसवणूक होऊ शकते, अशी भीती जागरूक नागरिक व्यक्त करत आहेत.

डोंबिवली येथे राहणारे संदीप बाऊस्कर हे नागरिक ११ जून रोजी डोंबिवलीहून दादरला जाण्यासाठी तिकीट काढण्यासाठी एटीव्हीएम मशीनचा वापर करत होते. तिकीट हातात घेतल्यावर त्यांनी तारीख पाहिली असता त्यावर ११ ऑगस्ट २०२५ ही तारीख छापलेली होती. हे लक्षात येताच त्यांनी रेल्वे प्रशासनाला याबाबत ट्विटरवरून तक्रार केली, मात्र प्रशासनाकडून ‘‘तक्रार संबंधित अधिकाऱ्यांकडे पाठवण्यात आली आहे’’ इतकेच उत्तर मिळाले.

या प्रकारामुळे सामान्य प्रवाशांना पुढे दंडात्मक कारवाईचा सामना करावा लागू शकतो. तिकीट तपासणीवेळी तांत्रिक चुकांमुळे प्रवाशांना अडवले गेल्यास दोष नसतानाही दंड भरावा लागू शकतो. याशिवाय ऑफिस, कंपन्या किंवा सरकारी भत्त्यासाठी प्रवासाचे तिकीट सादर करताना चुकीच्या तारखेचं तिकीट ग्राह्य धरले जात नाही आणि त्यामुळे प्रवाशांचे आर्थिक नुकसान होण्याची शक्यता आहे.