पार्किंगच्या वादातून तलवारीने हल्ला

पार्किंगच्या वादातून तलवारीने हल्ला
शिंदे गटाच्या पदाधिकाऱ्याला अटक
सकाळ वृत्तसेवा
ठाणे, ता. २३ : ठाण्यातील वागळे इस्टेट येथील नेहरूनगर परिसरात पार्किंगच्या वादातून तलवारीने हल्ला करून दोन तरुणांना मारहाण केल्याची धक्कादायक घटना समोर आली आहे. याप्रकरणी शिंदे गटाचे पदाधिकारी असल्याचा दावा करणाऱ्या आकाश भालेराव व सूरज हजारे यांना वागळे इस्टेट पोलिसांनी अटक केली आहे. वागळे नेहरूनगर परिसरात पार्क केलेली गाडी काढण्यास नकार दिल्याने शिंदे गटाच्या पदाधिकाऱ्याने तलवारीने तक्रारदार अजय देवरस आणि सचिन तासतोडे या दोघांवर तलवारीने हल्ला केला आहे. याप्रकरणी शिंदे गटाचे पदाधिकारी आकाश भालेराव आणि सूरज हजारे या दोघांना अटक केल्याची माहिती वागळे इस्टेट पोलिसांनी दिली. दरम्यान, शिंदे गटाच्या पदाधिकारी तलवार हवेत फिरवताना एक व्हिडिओ व्हायरल झाला होता.
मंगळवारी (ता. २२) सायंकाळी, तक्रारदार अजय देवरस आणि त्यांचा मित्र सचिन तासतोडे हे धर्मवीर वॉशिंग सेंटर, हॉकिंग्ज कुकर कंपनीसमोरील परिसरात बसले होते. त्या वेळी भालेराव आणि हजारे यांनी सचिनला फोन करून पार्क केलेली गाडी काढण्यास सांगितले, मात्र सचिनने त्या वेळी जाण्यास नकार दिला. याच गोष्टीचा राग मनात धरून दोन्ही आरोपी घटनास्थळी आले आणि सोबत आणलेल्या तलवारीने दोघांवर हल्ला केला. अजय देवरस यांच्या कपाळावर व डाव्या हातावर गंभीर जखमा झाल्या आहेत, तर सचिन तासतोडे यांच्या डाव्या हातावर, डोक्यावर व उजव्या पायाच्या पोटरीवर वार झाले. तक्रार प्राप्त होताच वागळे इस्टेट पोलिसांनी दोन्ही आरोपींविरुद्ध हल्ला, मारहाणप्रकरणी गुन्हा दाखल केला आहे. तसेच तत्काळ कारवाई करत आकाश भालेराव आणि सुरज हजारे यांना अटक करण्यात आली आहे. चौकशीदरम्यान आकाश भालेरावने स्वतःला शिंदे गटाचा पदाधिकारी असल्याचे सांगितले, अशी माहिती पोलिसांनी दिली. या हल्ल्यानंतर भालेराव तलवार हातात घेऊन परिसरात फिरत असल्याचा व्हिडिओदेखील समाजमाध्यमांवर व्हायरल झाला आहे. या प्रकरणाचा तपास वागळे इस्टेट पोलिस ठाण्याचे वरिष्ठ पोलिस निरीक्षक शिवाजी गवारी यांच्या मार्गदर्शनाखाली सुरू आहे.