ट्रकच्या धडकेत दोघे दुचाकीस्वार जखमी

भिवंडी, ता. २३ (वार्ताहर) : भिवंडी शहरालगतच्या ग्रामीण भागात वाहतूक कोंडीच्या समस्येने नागरिक त्रस्त असताना वाहनचालकांच्या निष्काळजीमुळे अपघातांच्या घटनेत वाढ होत आहे. अशाच एका अपघाताच्या घटनेत भरधाव ट्रकने दिलेल्या धडकेत दुचाकीवरील दोघे जण जखमी झाले आहेत.
पोलिसांनी दिलेल्या माहितीनुसार, ताडाळी परिसरात राहणारा युवक प्रेम विनय झा हा आपला मित्र रजनीस बजरंग झा याच्यासोबत दोघे दुचाकीवरून रात्री १२च्या सुमारास कामावरून घरी येत होता. त्याच वेळी दापोडे गावच्या हद्दीत एका ट्रकचालकाने भरधाव वाहन चालवत दुचाकीवरील दोघांना धडक दिली. यात दोघे गंभीर जखमी झाले आहेत. या अपघातानंतर ट्रकचालक फरार आहे. याप्रकरणी बिट्टू विनय झा यांनी दिलेल्या तक्रारीवरून नारपोली पोलिस ठाण्यात गुन्हा नोंदवण्यात आला आहे.