रोहा नगर पालिकेच्या नेहरुनगर शाळेला अखेरची घरघर. विद्यार्थी पट शुन्य.

रोहा नगरपालिकेच्या नेहरूनगर शाळेला अखेरची घरघर
विद्यार्थी पट शून्यः अतिरिक्त शिक्षकांवर बदलीची टांगती तलवार
रोहा, ता. २३ (बातमीदार) ः नगरपालिकेची नेहरूनगर प्राथमिक शाळा अखेरची घटका मोजत आहे. या शैक्षणिक वर्षात विद्यार्थी पट शून्य झाल्याने शाळा ओस पडली. यामुळे अतिरिक्त शिक्षकांवर बदलीची टांगती तलवार आहे. संपूर्ण परिस्थितीत नगरपालिका प्रशासन अधिकारी जबाबदार असल्याचे दिसून येत आहे.
गेल्या काही वर्षांपासून नेहरूनगर शाळेत प्रत्यक्ष हजर असणाऱ्या विद्यार्थ्यांची संख्या दोन किंवा तीनच होती. विद्यार्थीच नसल्याने शाळेला इतर ॲक्टिव्हिटीज आणि खेळांमध्ये भाग घेणे कठीण झाले. शाळेत खेळ आणि इतर ॲक्टिव्हिटी नसल्यास विद्यार्थ्यांच्या शारीरिक, मानसिक आणि सामाजिक विकासावर परिणाम होतो. विद्यार्थ्यांची खेळातील आवड कमी होते. तसेच त्यांच्यामध्ये आत्मविश्वास आणि टीमवर्कसारखी कौशल्येसुद्धा विकसित होत नाहीत. या पार्श्वभूमीवर नेहरूनगर शाळा बंद करण्याविषयी मागणी जोर धरू लागली होती. २०२५-२६ या शैक्षणिक वर्षात पालकांनी नेहरूनगर शाळेकडे पूर्णतः पाठ फिरविली असून, शाळेचा पट शून्य झाला आहे.

शिक्षकांच्या लाभासाठी शाळा सुरूच
शाळांतील पट कमी होत असतानही नगरपालिका प्रशासन अधिकाऱ्यांनी शिक्षण विभागाकडे गेल्या वर्षी मार्च महिन्यात सात वाढीव शिक्षकांची मागणी केली होती. नेहरूनगर शाळा बंद पडली, तर नव्याने रुजू झालेले शिक्षक अतिरिक्त ठरणार असून, त्यांची बदली क्रमप्राप्त आहे. या शिक्षकांच्या लाभासाठी प्रशासन अधिकारी यांनी शून्य विद्यार्थी पट असतानासुद्धा नेहरूनगर शाळा सुरू ठेवल्याचे बोलले जात आहे.

समायोजन होणार
रोहा नगरपालिकेच्या नेहरूनगर प्राथमिक शाळेचा पट शून्य झाला आहे. या शाळेचे आणि शिक्षकांचे समायोजन रोहा नगरपालिकेच्या दुसऱ्या शाळेत करण्यासाठी प्रक्रिया सुरू झाली आहे. आठ ते १० दिवसांत कार्यवाही पूर्ण होईल, असे नगरपालिकेचे प्रशासन अधिकारी संतोष कंटे यांनी म्हटले आहे.

फोटो कॅप्शन : रोहा अष्टमी नगरपालिकेची शून्य पट असलेली नेहरूनगर शाळा