विनापरवाना औषध विक्री करणाऱ्यावर बडगा

विरार, ता. २३ (बातमीदार) : वसई-विरार महापालिकेच्या दवाखान्यात अप्रमाणित औषधे मिळाल्याचे प्रकरण ताजे असतानाच आता वसई तालुक्यातील हॉस्पिटलमध्ये विनापरवाना एका खोलीमध्ये औषधविक्री करणाऱ्यावर पालघर जिल्हा अन्न व औषध विभागाने कारवाई केली. या विक्रेत्याकडून ८५ हजारांची औषधे जप्त करण्यात आली असून, दुकान सील करण्यात आल्याचे विभागाचे सहाय्यक आयुक्त महेश गाडेकर यांनी सांगितले.

पालघर जिल्ह्यातील औषध व अन्न प्रशासन विभागाला वसई पश्चिम येथे भाबोळा येथील नवजीवन हॉस्पिटलमध्ये एक व्यक्ती विनापरवाना औषधविक्री करत असल्याबाबतची माहिती मिळाली होती. प्रशासनाने याबाबतची खातरजमा करून संबंधित व्यक्तीकडे डॉक्टरांची औषधांची चिठ्ठी घेऊन त्यांच्याकडून औषधे घेतली व खात्री करून घेतली. या प्रकाराची खातरजमा झाल्यानंतर सहाय्यक आयुक्त महेश गाडेकर यांनी आपल्या पथकासह नवजीवन रुग्णालयामध्ये धाड टाकली. या धाडीमध्ये व्यक्ती एका खोलीमध्ये विनापरवाना औषध विक्री करण्याचा व्यवसाय करत असल्याचे निदर्शनास आले. त्याला रंगेहाथ पकडण्यात आले. या औषधांमधील काही नमुने पुढील तपासासाठी प्रयोगशाळेत पाठवण्यात आल्याचे अधिकाऱ्यांनी सांगितले. हा व्यक्ती मागील सात ते आठ महिन्यांपासून विनापरवाना औषधविक्री करत असल्याचे समजते.

परवाना सरकारकडे जमा
संबंधित व्यक्तीचे यापूर्वीदेखील औषधविक्रीचे दुकान होते, मात्र त्याने स्वतःचा औषधविक्रीचा परवाना सरकारकडे जमा केला होता व त्यानंतर तो रुग्णालयात खोली घेऊन त्या ठिकाणाहूनच विनापरवाना औषधांचीविक्री करत होता.