उल्हासनगरात चक्क रुग्णवाहिकेचीच चोरी

उल्हासनगर, ता. २३ (वार्ताहर) : शहरात काळजाचा ठोका चुकवणारी घटना समोर आली आहे. रुग्णवाहिका म्हणजे जिथे जीवनाच्या आशेचा श्वास असतो, तीच चोरीस गेल्याची धक्कादायक बाब समोर आली. या गुन्ह्याचा वेगाने छडा लावत विठ्ठलवाडी पोलिसांनी अवघ्या काही तासांत चोरांची टोळी उघडकीस आणली आहे. यात चार अल्पवयीन चोरट्यांना ताब्यात घेण्यात यश मिळवले आहे. पोलिसांच्या या धडाकेबाज कारवाईचे सर्वत्र कौतुक होत आहे.
साई सारथी अपार्टमेंटमध्ये राहणारा अभिषेक तिवारी याने आपली रुग्णवाहिका शिवनेरी रुग्णालयाच्या प्रवेशद्वाराजवळ उभी केली होती. रात्रीच्या वेळी तो घरी जेवणासाठी गेल्यानंतर ती चोरीस गेली. पहाटे ४ वाजता रामरक्षा रुग्णालयातून दुसऱ्या रुग्णालयात रुग्ण हलवण्याची गरज पडल्यावर अभिषेकने गाडी शोधण्याचा प्रयत्न केला. मात्र ती गायब होती. चौकशीअंती सुरक्षा रक्षकाने एका व्यक्तीला रुग्णवाहिका घेऊन जाताना पाहिल्याचे सांगितले.
अभिषेकने तत्काळ विठ्ठलवाडी पोलिस ठाण्यात तक्रार दाखल केली. वरिष्ठ पोलिस निरीक्षक अशोक कोळी यांच्या मार्गदर्शनाखाली पोलिस पथकाने तांत्रिक तपास, परिसरातील सीसीटीव्ही फुटेज आणि गुप्त माहितीच्या आधारे तपास सुरू केला. काही तासांतच अंबरनाथमधील हेरंब मंदिर परिसरातून ती रुग्णवाहिका शोधून काढण्यात आली. या घटनेचा सखोल तपास करताना ही कारवाई केवळ रुग्णवाहिकाच नव्हे तर एक बर्गमन स्कूटर व एक दुचाकींच्या चोरीशी संबंधित असल्याचेही उघड झाले. पोलिसांनी तिन्ही वाहने जप्त केली. संबंधित चार अल्पवयीन चोरटे पोलिसांच्या ताब्यात आहेत. हे टोळीच्या स्वरूपात वाहनचोरी करत असल्याचा संशय व्यक्त केला जात आहे.