पनवेलमधील रस्‍ते होणार चकाचक!

पनवेलमधील रस्‍ते होणार चकाचक!
नागरिकांच्या तक्रारीनंतर महापालिका ॲक्शन मोडवर
नवीन पनवेल, ता. २३ (बातमीदार) : पनवेल शहरातील रस्त्यांवरील खड्डे आणि त्यामुळे होणारे अपघात गेल्या काही आठवड्यांपासून नागरिकांमध्ये चर्चेचा विषय ठरले होते. खड्ड्यांमुळे वाहनचालकांसह नागरिकांची डोकेदुखी वाढली होती. याबाबत नागरिकांनी सोशल मीडियापासून ते थेट पालिका प्रशासनापर्यंत तक्रारींचा पाढा वाचवायला सुरुवात केली होती. अनेक राजकीय पक्षांकडून निवेदने देण्यात आली. यामुळे अखेर महापालिका ॲक्‍शन मोडवर आली असून, शहरातील खड्डेमय रस्‍त्‍यांची डागडुजी करण्यास सुरुवात केली आहे.
नवीन पनवेल, कामोठे, कळंबोली आणि आदई सर्कल परिसरात खड्ड्यांमुळे वाढलेले अपघाताचे प्रमाण, वाहतूक कोंडी, नागरिकांचे हाल यामुळे पालिकेच्या अभियंता व ठेकेदारांवर संताप व्यक्त केला जात होता. अनेक सामाजिक संघटना, राजकीय पक्ष आणि स्थानिक रहिवाशांनी याविरोधात मोर्चेबांधणी केली होती. त्‍यामुळे अखेर महापालिकेने शहरातील विविध प्रभागांमध्ये रस्त्यांवरील खड्डे बुजवण्याचे काम युद्धपातळीवर सुरू केले आहे. याबाबत नागरिकांकडून समाधान व्‍यक्‍त केले जात आहे.
...................
तात्पुरती डागडुजी की कायमस्वरूपी उपाय?
सद्यःस्थितीत महापालिकेने पावसाळ्याचा विचार करून तात्पुरती डागडुजी सुरू केली असली, तरी नागरिकांकडून कायमस्वरूपी उपाययोजनांची मागणी होत आहे. पावसात भराव लवकर उखडतो. त्यामुळे कामांच्या टिकाऊपणावर प्रश्नचिन्ह येत आहे. पालिकेकडून रस्त्यांची कायमस्वरूपी दुरुस्ती करताना दर्जेदार साहित्य वापरून दीर्घकालीन उपाययोजना कराव्यात, अशी मागणी नागरिकांकडून होत आहे.
.............
कोट्यवधींचा निधी, तरीही खड्डे
महापालिकेने प्रभागनिहाय चार ठेकेदारांची नियुक्ती करून रस्त्यांच्या दुरुस्तीवर कोट्यवधी रुपये खर्च केले आहेत, मात्र कामाचा दर्जा अत्यंत निकृष्ट असल्याचे नागरिकांचे म्हणणे आहे. याचाच परिणाम म्हणजे यंदाच्या पावसाळ्यात नव्याने डागडुजी केलेल्या रस्त्यांवरही मोठे खड्डे पडले आहेत. विशेषतः पनवेल रेल्वेस्थानक परिसर, बसस्थानकाजवळील रस्ते आणि महत्त्वाचे चौक या ठिकाणी रस्त्यांची अवस्था अत्यंत बिकट झाली आहे.
...................
प्रहार जनशक्ती पक्षाचा विरोध
या पार्श्वभूमीवर प्रहार जनशक्ती पक्षाचे नेते सुनील शिरिषकर यांनी महापालिकेला निवेदन दिले होते. रस्त्यांच्या निकृष्ट दर्जाच्या कामांबद्दल आक्षेप घेतला होता. पूर्वीच कोट्यवधी रुपये खर्चून रस्त्यांचे कंत्राट देण्यात आले, तरीही पुन्हा नवीन कार्यादेश का? हा नागरिकांच्या पैशांचा अपव्यय आहे, असे त्‍यांनी सांगितले होते. यासोबतच त्यांनी संबंधित कनिष्ठ अभियंत्यांवर शिस्तभंगाची कारवाई आणि ठेकेदाराला काळ्या यादीत टाकण्याची मागणी केली होती. या आरोपांवर प्रतिक्रिया देताना पालिकेच्या अभियंत्यांनी काही ठिकाणी पाहणी करून तातडीने काम पूर्ण करण्याचे आश्वासन दिले होते. तसेच काही प्रभागांमध्ये रस्त्यांचे रीसर्फेसिंग कामदेखील सुरू करण्यात आल्याचे सांगितले होते.
...............