गृहमंत्री संरक्षणाची जबाबदारी घेणार का ?

शिवसेना, ठाकरे गट आक्रमक
कल्याण मारहाणप्रकरणी कडक कारवाईची मागणी
सकाळ वृत्तसेवा
डोंबिवली, ता. २३ : कल्याणमध्ये मुलीला मारहाणप्रकरणी शिवसेना उद्धव बाळासाहेब ठाकरे आणि उपमुख्यमंत्री एकनाथ शिंदे यांच्या नेतृत्वाखालील शिवसेना आक्रमक झाली आहे. ठाकरे गटाचे शिष्‍टमंडळ आणि शिवसेनेचे आमदार राजेश मोरे यांनी मानपाडा पोलिस ठाण्याचे वरिष्‍ठ पोलिस निरीक्षक संदीपान शिंदे यांची भेट घेऊन आरोपीवर कडक कारवाईची मागणी केली.

ठाकरे गटाच्या शिष्‍टमंडळात जिल्हाप्रमुख दीपेश म्हात्रे, धनंजय बोडारे, महिला संघटक वैशाली दरेकर राणे यांचा समावेश होता. या वेळी जिल्हाप्रमुख म्हात्रे यांनी मराठी तरुणीवर हल्ला करणाऱ्यावर ३०७ प्रमाणे हत्येचा प्रयत्नाचा गुन्हा दाखल करण्याची मागणी केली. गुन्हा दाखल झाल्यानंतर २२ तास उलटूनही पोलिसांना आरोपी सापडला नव्‍हता असे सांगत नाराजी व्‍यक्त केली.

जिल्हा संघटिका वैशाली दरेकर म्हणाल्या की, महाराष्ट्र आणि ठाणे जिल्ह्यात मोठ्या प्रमाणात महिला आणि मुलींवर मारहाण आणि हल्ल्याच्या घटना घडत आहेत. महाराष्ट्रातील महिलांच्या रक्षणासाठी कोण भाऊ आहे का? सर्व महिलांनी शिवसेना उद्धव बाळासाहेब ठाकरे पक्षाच्या महिला पदाधिकाऱ्यांकडे राख्या पाठवाव्यात. त्या आम्ही गृहमंत्र्यांना पाठवून आणि त्यांना विचारू की, तुम्ही आमची अथवा महाराष्ट्रातील महिलांच्या संरक्षणाची जबाबदारी व रक्षणाची जबाबदारी स्वीकारणार आहात का? या वेळी त्यांनी भाजपच्या आमदार चित्रा वाघ आणि महिला आयोगावरही टीका केली.
---
मराठी तरुणांना मारहाण
सहन करणार नाही : मोरे
कल्याणमध्ये तरुणीला मारहाण झाल्याप्रकरणी शिवसेना शिंदे गटाचे कल्याण ग्रामीणचे आमदार राजेश मोरे यांनीही मानपाडा पोलिस ठाण्याचे वरिष्ठ पोलिस निरीक्षक संदीपान शिंदे यांची भेट घेतली. या प्रकरणातील आरोपीला कठोर शिक्षा झाली पाहिजे, अशी मागणी त्यांनी केली. महाराष्‍ट्रात मराठी तरुणांना मारहाण होत असेल, तर ते खपवून घेतले जाणार नाही. तरुणीला मारहाण ही खेदजनक बाब आहे.