नोंदणी प्रक्रियेला म्हाडाची मुदतवाढ

नोंदणी प्रक्रियेला म्हाडाची मुदतवाढ
पुणे मंडळाचा गाळ्यांबाबत निर्णय

सकाळ वृत्तसेवा
मुंबई, ता. २३ : म्हाडाच्या पुणे मंडळाने पुणे, सोलापूर, सांगली जिल्ह्यातील विविध योजनांतर्गत ५३ अनिवासी व २८ कार्यालयीन गाळ्यांची विक्रा ई-लिलावाद्वारे केली जाणार आहे. त्याकरिताच्या ऑनलाईन नोंदणी व अर्ज भरणा प्रक्रियेला म्हाडाने १ ऑगस्टपर्यंत मुदतवाढ दिली आहे. त्यामुळे अद्याप अर्ज न केलेल्यांना आणखी संधी मिळाली आहे.
पुणे मंडळातील अनिवासी व कार्यालयीन गाळे ई-लिलावामार्फत विक्रीसाठी ई-लिलाव प्रक्रियेत भाग घेण्यासाठी https://eauction.mhada.gov.in संकेतस्थळावर नोंदणी करणे, ऑनलाईन अर्ज करणे, कागदपत्रे अपलोड करणे, अनामत रक्कम ऑनलाईन भरणे याबाबतची मुदत संपत आली होती. त्यामुळे म्हाडाने त्याला १ ऑगस्टला रात्री ११.५९ वाजेपर्यंत मुदतवाढ दिली आहे. ई-लिलावाकरिता आरटीजीएस, एनईएफटीद्वारे अनामत रकमेचा भरणा १ ऑगस्ट रोजी संबंधित बँकेच्या कार्यालयीन वेळेपर्यंत करता येणार आहे. संगणकीय प्रणालीमध्ये पात्र ठरलेल्या अर्जदारांसाठी ऑनलाइन बोली स्वरूपातील ई-लिलाव https://eauction.mhada.gov.in या संकेतस्थळावर होणार आहे. ई-लिलावाचा एकत्रित निकाल लिलावाची बोली (बिडिंग) संपल्यावर दोन कार्यालयीन दिवसानंतर जाहीर केला जाणार आहे.