फेर मतमोजणीत दावे-प्रतिदावे

फेर मतमोजणीत दावे-प्रतिदावे
शिवसेना ठाकरे गट-निवडणूक आयोगामध्ये जुंपली
सकाळ वृत्तसेवा
ठाणे, ता. २३ : विधानसभा निवडणुकीच्या मतदानासंदर्भातला संभ्रम दूर करण्यासाठी फेरतपासणी करण्यात आली आहे; मात्र या फेरतपासणीवरून पुन्हा शिवसेना ठाकरे गट आणि निवडणूक आयोगामध्ये जुंपली आहे. ही फेरतपासणी फसवी असल्याचा आरोप ठाकरे गटाने केल्यानंतर जिल्हा निवडणूक अधिकाऱ्यांनी ती पारदर्शक झाल्याचा दावा केला आहे. त्यावर सीसीटीव्ही फुटेज देण्यास टाळाटाळ का केली जात आहे, असा प्रश्न ठाकरे गटाने उपस्थित केला आहे.

२०२४ साली झालेल्या विधानसभा निवडणुकीच्या निकालावर संशय व्यक्त करीत शिवसेना ठाकरे गटाने न्यायालयात धाव घेतली होती. न्यायालयाच्या निर्देशानुसार १९ जुलैला नवी मुंबई तुर्भे येथे ठाणे विधानसभा मतदानाची फेरतपासणी करण्यात आली; मात्र ही तपासणी म्हणजे लपवाछपवी असल्याचा आरोप ठाकरे गटाचे नेते आणि माजी खासदार राजन विचारे यांनी केला होता. हे वृत्त प्रसिद्ध होताच दुसऱ्या दिवशी ठाणे जिल्हा कार्यालयातून प्रसिद्धिपत्रक काढण्यात आले. यामध्ये मतमोजणीसाठी संबंधितांना पर्याय दिले होते. त्यांच्या संमतीने सर्व प्रक्रिया पार पडली असून ती पारदर्शक असल्याचा दावा करण्यात आला आहे. तसेच, ईव्हीएम तपासणी आणि पडताळणी समाधानकारक झाल्याचे म्हटले आहे. यावरच ठाकरे गटाने आक्षेप घेतला आहे. ठाकरे गटाच्या दाव्यानुसार निवडणूक आयोगाने नव्याने बनवलेल्या एसओपीनुसार ईव्हीएम, व्हीव्हीपॅट मशीनची तपासणी व पडताळणी करताना तांत्रिक प्रक्रिया कशी असणार, याचे कोणतेही प्रात्यक्षित संबंधित प्रतिनिधींना देण्यात आले नव्हते. यासंदर्भात लेखी माहिती देण्यात यावी, अशी विनंती करणारे पत्र फेरतपासणीच्या दोन दिवसांपूर्वी निवडणूक अधिकाऱ्यांना देण्यात आले होते; पण तसे झाले नाही. त्यामुळे फेरतपासणी करताना ईव्हीएममधील डेटा डिलिट होईल, या भीतीने अधिकाऱ्यांच्याच सांगण्यानुसार डायग्नॉस्टिक चेकिंक हा पर्याय निवडण्यात आला असल्याचे ठाकरे गटाचे म्हणणे आहे.

प्रक्रिया पारदर्शकच!
मतदानाची फेरतपासणी निवडणूक आयोगाने प्राधिकृत केलेल्या भारत इलेक्ट्रॉनिक्स लिमिटेड कंपनीच्या अभियंत्याद्वारे पूर्ण करण्यात आली आहे. ठाकरे गटाच्या आक्षेपानुसार कुणाला किती मतदान झाले हे न दाखवता एकूण मतदान दाखवण्यात आले; पण मॉक पोल हा पर्याय निवडल्यास केंद्रावरील संपूर्ण निकाल दाखवण्यात येतात, तर डायग्नॉस्टिक पर्यायामध्ये मशीनमधील एकूण मतदान दाखवण्यात येते. त्यामुळे संबंधित प्रतिनिधींनी
निवडलेल्या पर्यायानुसार मतमोजणी करण्यात आली आहे.
----
बॅटरीची शंका कायम
- ठाणे विधानसभा मतदान केंद्र क्रमांक ६८ वरील व्हीव्हीपॅट मशीनमध्ये बॅटरी तशीच का ठेवण्यात आली होती, याकडे शिवसेना ठाकरे गटाने लक्ष वेधले होते. यावर मतदान केंद्र ६८च्या मतदान केंद्राध्यक्ष यांनी मतदानाच्या दिवशी मतदान संपल्यावर व्हीव्हीपॅट मशीनमधील बॅटरी काढली नव्हती. हे निवडणूक अधिकाऱ्यांनीही मान्य केले आहे. ईव्हीएम मशीन तीन वेळा सुरू करावी लागते, मग ती चार वेळा सुरू कशी झाली आणि मतदान केंद्रावर चौथ्यावेळी मशीन सुरू का झाली, हे पाहण्यासाठी सीसीटीव्ही फुटेज देण्यास टाळाटाळ का करण्यात येते, यावर स्पष्टीकरण मिळालेले नाही.