पिंपरी चिंचवड उबर चालकांना दिलासा

पुणे, पिंपरी-चिंचवडमधील
उबरचालकांना दिलासा
रिक्षा संघटनांना हस्तक्षेप करण्यास मज्जाव
सकाळ वृत्तसेवा
मुंबई, ता. २३ ः भाडेवाढीच्या मुद्द्यावरून पुणे आणि पिंपरी-चिंचवडमधील उबरचालकांच्या विरोधात आंदोलन करणाऱ्या रिक्षाचालक संघटनांनी त्यांच्या कामात व्यत्यय आणू नये, व्यवसायात हस्तक्षेप करू नये, असे आदेश उच्च न्यायालयाने मंगळवारी (ता. २३) रिक्षा संघटनांना दिले. न्यायालयाच्या या निर्णयामुळे उबरचालकांना तूर्तास दिलासा मिळाला आहे.
प्रथमदर्शनी विचार करता याचिकाकर्त्यांची याचिका नाकारता येणार नाही. आधीच परिस्थितीवर अंकूश न ठेवल्यास प्रकरण आणखी चिघळू शकते, असे निरीक्षण न्या. रियाझ छागला यांच्या एकलपीठाने नोंदवले. आंदोलन करणाऱ्या रिक्षा संघटनांनी उबरच्या चालकांना किंवा उबरमधून प्रवास कऱणाऱ्या प्रवाशांना रोखू अथवा अडवू नये किंवा चालकांना मारहाण करून त्यांच्या व्यवसायात व्यत्यय आणू नये, असे आदेशही न्यायालयाने दिले. तसेच वाहतूक पोलिसांच्या सह आयुक्तांना उबरचालकांना तत्काळ पोलिस संरक्षण देण्याचे आणि चालकांना व्यवसायात अडथळा येणार नाही, याची खात्री करण्याचे आदेशही दिले.