पांडवादेवी येथे एक हजार आदिवासी जोडपी विवाहबद्ध

पांडवादेवी येथे एक हजार आदिवासी जोडपी विवाहबद्ध
पोयनाड, ता. २४ (बातमीदार) : अलिबाग तालुक्यातील पांडवादेवी येथे नुकताच सामुदायिक विवाह सोहळा पार पडला. यामध्ये १ हजार आदिवासी जोडपी विवाहबद्ध झाली. या सामुदायिक विवाह सोहळ्याचे आयोजन मूळ निवासी आदिवासी कातकरी समाज विकास संस्थेने केले होते. या सामुदायिक विवाह सोहळ्याला हरिद्वार आखाड्याच्या महामंडलेश्वर डॉ. भगवती नंदा नंदगिरी या प्रमुख अतिथी म्हणून उपस्थित होत्या.
आदिवासी समाजातील या सामुदायिक विवाह सोहळ्याचे कौतुक करून विवाह सोहळ्यावर होणारा अमाप खर्च टाळून आदिवासी कातकरी समाज विकास संस्थेसारखे उपक्रम समाजात राबवून त्याला समाजाकडून सहकार्य मिळणे अपेक्षित आहे. आदिवासी विकास विभागाने शासकीय योजनांचा लाभ मिळवून देण्याबरोबरच अशा सामुदायिक विवाह सोहळ्याच्या उपक्रमाला प्रोत्साहन देणे गरजेचे असल्याचे डॉ. भगवती नंदा नंदगिरी या वेळी म्हणाल्या. या कार्यक्रमाला जुनागडचे हनुमानदास, काजशी वाघुल, एकनाथ पवार, हेमंत गिरी, हभप पद्माकर म्हात्रे या साधू-महंतांनी सोहळ्याला उपस्थित राहत नवविवाहित दाम्पत्यांना शुभाशीर्वाद दिले. या वेळी एकात्मिक आदिवासी प्रकल्पाचे आनंद पाटील, राष्ट्रवादी काँग्रेसचे अलिबाग विधानसभा मतदारसंघाचे अध्यक्ष अमित नाईक, भाजपचे ॲड. आस्वाद पाटील, रायगड जिल्हा आदिवासी कातकरी समाज संघटनेचे संतोष वाघमारे, केतन वाघमारे, सखाराम पवार, दिलीप कदम, नारायण लोभी, कांता वाघमारे, महेश वाघमारे आदी उपस्थित होते.