कल्याण-डोंबिवली महापालिकेच्या संकेतस्थळावरील तांत्रिक त्रुटीची दखल; अपूर्ण फोन क्रमांकाची सुधारणा

अपूर्ण फोन क्रमांकाची तातडीने दुरुस्ती
‘सकाळ’मधील वृत्ताची दखल; महापालिकेच्या संकेतस्थळावरील त्रुटी दूर
टिटवाळा, ता. २४ (वार्ताहर) ः कल्याण-डोंबिवली महापालिकेच्या अधिकृत संकेतस्थळावरील तांत्रिक अडचणी आणि चुकीच्या माहितीकडे अनेक नागरिकांनी लक्ष वेधले होते. त्यानंतर महापालिकेने संबंधित त्रुटीची तातडीने दखल घेतली असून, शहर अभियंता अनिता परदेशी यांचा अपूर्ण संपर्क क्रमांक आता दुरुस्त केला आहे.
याआधी संकेतस्थळाच्या मुख्य पृष्ठावर त्यांच्या नावासमोर केवळ ०२५१२२०६१ असा सात आकडी फोन नंबर नमूद केला होता. हा पूर्णपणे चुकीचा आणि दिशाभूल करणारा होता. त्यामुळे नागरिकांना थेट संपर्क करण्यात मोठी अडचण येत होती. याचे वृत्त सकाळमध्ये प्रसिद्ध होताच आयटी विभागाकडून तातडीने सुधारणा करण्यात आली. सुधारणा केवळ एका त्रुटीपुरती मर्यादित नसावी, तर अशा अनेक तांत्रिक चुका आणि अडचणींचा सातत्याने आढावा घेऊन वेबसाइट अधिक वापरकर्ता-सुलभ, कार्यक्षम आणि पारदर्शक व्हावी, अशी नागरिकांची अपेक्षा आहे.

सकाळ वृत्ताची दखल
ही बाब सकाळ वृत्तपत्राच्या माध्यमातून उघड करण्यात आली होती. याबाबतचे वृत्त १९ जुलैच्या सकाळ अंकात प्रसिद्ध होताच महापालिकेच्या आयटी विभागाने तातडीने सुधारणा करत आता पूर्ण आणि योग्य क्रमांक ०२५१२२०६१२४ तसेच अधिकृत ई-मेल आयडी संकेतस्थळावर टाकले आहेत.

संकेतस्थळाचे पुर्नडिझाइन होणार
सूत्रांनी दिलेल्या माहितीनुसार, पुढील काही आठवड्यांत संकेतस्थळाचे पुनर्डिझाइन आणि वेगवर्धनाचे काम सुरू होण्याची शक्यता असून, नागरिकांच्या सोयीसाठी फीडबॅक सेक्शनदेखील लवकरच सुरू करण्यात येणार आहे.

अशा प्रकारे नागरिकांच्या तक्रारींना तातडीने प्रतिसाद मिळणे ही स्वागतार्ह बाब असली, तरीही हे केवळ सुरुवात आहे. स्मार्ट सिटीच्या नावाला साजेशी सेवा मिळण्यासाठी महापालिकेने सातत्यपूर्ण आणि जबाबदार पावले उचलणे आवश्यक आहे.
- मनोज वाघमारे, स्थानिक नागरिक