मुरबाड-झाडघर बससेवा बंद

टोकावडे, ता. २४ (बातमीदार) : मुरबाड ते मोहवाडी, झाडघर, चासोळे, जडई, फांगळोशी या मार्गावरील एसटी बस सेवा दोन महिन्यांपासून बंद आहे. याचा फटका अनेक विद्यार्थ्यांना बसत असून दररोज शाळा-महाविद्यालयांत जाण्यासाठी हाल सहन करावे लागत आहेत.
सकाळी व दुपारी या भागातून बस सेवा उपलब्ध नसल्याने अनेक विद्यार्थी वेळेवर शाळा गाठू शकत नाहीत. दुपारी सुटल्यावर वाहनांची सोय नसल्यामुळे काहींना पायी प्रवास करावा लागतो, तर काहींना खासगी वाहने शोधावी लागतात. त्यामुळे वेळ, पैसा आणि शारीरिक त्रास यांचा त्रिप्पट ताण विद्यार्थ्यांवर येत आहे. घरी पोहचण्यास विलंब होत असल्याने विद्यार्थ्यांचे शैक्षणिक नुकसान होत असून मानसिक तणाव वाढत आहे.

झाडघर-मोहवाडी दरम्यानचा अडीच ते तीन किलोमीटरचा रस्ता नुकताच काँक्रीट करण्यात आला आहे. मात्र, साईड भराव न केल्याने मोठ्या वाहनांची वाहतूक अडथळ्याची झाली आहे. त्यामुळेच एसटी प्रशासनाने तात्पुरती सेवा थांबवली असल्याचे मुरबाड बस आगाराकडून सांगण्यात येते. याचा नाहक त्रास मात्र विद्यार्थी, पालक आणि ग्रामस्थांना सहन करावा लागत आहे.

----
मोहवाडी-झाडघर-जडई - चासोळे परिसरातील विद्यार्थ्यांना बस बंद असल्यामुळे सकाळची शाळा वेळेवर मिळत नाही. दररोज एक तास मुले उशिरा पोहोचतात, टोकावडे, शिवळे येथे जाणाऱ्या मुलांचे खूप हाल होत आहेत. त्यामुळे बस सेवा तत्काळ सुरू करावी.
- नंदकुमार राऊत, ग्रामस्थ चासोळे