उल्हासनगरमध्ये प्लास्टिक साठ्याचा पर्दाफाश

उल्हासनगर, ता. २४ (वार्ताहर) : प्रदूषणमुक्त शहराचा संकल्प केलेल्या उल्हासनगर महापालिकेने मंगळवारी (ता. २२) संध्याकाळी धडक कारवाई करत प्रतिबंधित प्लॅस्टिकचा साठा जप्त केला. ‘आनंद प्लास्टिक’ या दुकानावर छापा टाकत कारवाई केल्याने शहरातील प्लॅस्टिक विक्रेत्यांमध्ये खळबळ उडाली आहे. आयुक्त मनीषा आव्हाळे यांच्या मार्गदर्शनाखाली महापालिकेच्या प्रभाग समिती एकचे सहाय्यक आयुक्त अजय साबळे यांच्या नेतृत्वात ही कारवाई करण्यात आली.
उल्हासनगर महापालिकेच्या अतिक्रमणविरोधी मोहिमेदरम्यान फेरीवाल्यांकडे मोठ्या प्रमाणात प्रतिबंधित प्लॅस्टिक पिशव्या आढळून आल्या. तपासाअंती या पिशव्या ‘आनंद प्लास्टिक’ या दुकानातून विकत घेतल्याचे स्पष्ट झाल्यावर साबळे यांनी त्वरित कारवाईचे आदेश दिले. नियोजनपूर्वक राबवलेल्या या कारवाईत कॅम्प १ मधील झुलेलाल मंदिरासमोरील या दुकानावर छापा टाकला. यात सुमारे ५० ते १०० किलोपर्यंतचे प्रतिबंधित प्लॅस्टिक साहित्य जप्त करण्यात आले. हे साहित्य महाराष्ट्र प्रदूषण नियंत्रण मंडळाच्या नियमांनुसार अशा प्रकारचे प्लॅस्टिक विकणे किंवा वापरणे हा गुन्हा मानला जातो. महापालिकेने दुकानदारावर दंडात्मक कारवाई करत जप्त केलेले साहित्य पालिकेच्या ताब्यात घेतले आहे.

प्लॅस्टिक कारखान्यांवर कारवाई कधी?
उल्हासनगर महापालिकेने प्रतिबंधित प्लॅस्टिक पिशव्याविक्रेत्यांवर दंडात्मक कारवाई करत मोठा साठा जप्त केला, हे निश्चितच स्वागतार्ह आहे. मात्र, या पिशव्या विक्रीसाठी येतात तरी कुठून? शहरात लपूनछपून प्लॅस्टिक उत्पादन करणाऱ्या कारखान्यांकडे प्रशासनाचे दुर्लक्ष का? दुकानदारांवर कारवाई करून केवळ वरचेवरचे हात झटकले जात आहे; मात्र मूळ समस्येला हात घालण्याची गरज आहे. कारखान्यांवर थेट कारवाई केल्याशिवाय ही समस्या कायमची संपणार नाही, अशी जोरदार मागणी नागरिकांतून होत आहे.

उल्हासनगरला प्लास्टिकमुक्त बनवण्याचा निर्धार आहे. नियमांचे उल्लंघन करणाऱ्यांवर कठोर कारवाई करणे गरजेचे आहे. आनंद प्लास्टिक दुकानावरील ही कारवाई एक इशारा आहे. यापुढे गुन्ह्यांना क्षमा नाही. केवळ विक्रेतेच नव्हे तर उत्पादन करणाऱ्यांवरही लक्ष ठेवून कारवाई केली जाईल.
- अजय साबळे, सहाय्यक आयुक्त