ऐरोलीत वाहनतळासह मल्टीपर्पज हॉलची मागणी

ऐरोलीत वाहनतळासह मल्टिपर्पज हॉलची मागणी
माजी नगरसेवकांचे वनमंत्री यांच्यासह आयुक्तांना निवेदन
वाशी, ता. २२ (बातमीदार) : ऐरोली सेक्टर-१५ येथील सिडकोच्या मोकळ्या भूखंडावर वाहनतळ आणि अत्याधुनिक मल्टिपर्पज हॉल उभारण्याची मागणी माजी नगरसेवक व माजी आरोग्य समिती सभापती अशोक पाटील यांनी केली आहे. वनमंत्री गणेश नाईक यांच्या उपस्थितीत झालेल्या जाहीर कार्यक्रमात त्‍यांनीही मागणी करत पालिका आयुक्त डॉ. कैलास शिंदे यांना निवेदन दिले आहे.
या भूखंडावर यापूर्वी तात्पुरते अग्निशमन केंद्र उभारले गेले होते, मात्र सध्या हे केंद्र ऐरोली सेक्टर-३ मधील मूळ जागेवर स्थलांतरित झाले आहे. परिणामी, भूखंड मोकळा असून, नवीन सार्वजनिक सुविधांसाठी उपयोगात आणण्याची संधी निर्माण झाली आहे. या भूखंडाच्या शेजारी हेगडे भवन, डॉ. बाबासाहेब आंबेडकर स्मारक, आयप्पा मंदिर, गुरुद्वारा, आणि महावितरणचे कार्यालय यांसारखी महत्त्वाची ठिकाणे आहेत. येथे नागरिकांची मोठ्या प्रमाणावर ये-जा असते, परिणामी वाहनतळाचा अभाव जाणवतो. त्यामुळे वाहने रस्त्यांवर उभी राहून वाहतुकीस अडथळा निर्माण करतात.
...............
मल्टिपर्पज हॉलची मागणी
पाटील यांनी सांगितले की, सामाजिक, सांस्कृतिक व धार्मिक उपक्रमांसाठी रहिवाशांना नेहमीच योग्य ठिकाणाचा अभाव जाणवतो. त्यामुळे या भूखंडावर सुसज्ज मल्टिपर्पज हॉल उभारल्यास नागरिकांची गैरसोय दूर होईल. त्‍यामुळे सिडकोच्या मोकळ्या भूखंडावर वाहनतळ आणि मल्टिपर्पज हॉल उभारण्यात यावे, अशी मागणी अशोक पाटील यांनी केली आहे.