शहरातील ‘ई-टॉयलेट’चा गैरवापर

शहरातील ‘ई-टॉयलेट’चा गैरवापर
रात्रीच्या वेळी तृतीयपंथीयांचा ताबा; वाहनचालक, महिलांमध्ये संताप
वाशी, ता. २४ (बातमीदार) : नवी मुंबई महापालिकेने स्मार्ट सिटी योजनेतंर्गत ठाणे-बेलापूर मार्गावर उभारलेली ई-टॉयलेट सेवा आता अडचणीत आली आहे. यातील अनेक यंत्रणा बंद अवस्थेत असून, स्वच्छतेचा अभाव व देखभाल नसल्यामुळे ही टॉयलेट वापरात राहिलेली नाहीत. यामुळे रात्रीच्या वेळेस काही तृतीयपंथीयांकडून या टॉयलेटचा गैरवापर होत असल्याची तक्रार वाहनचालक आणि स्थानिक नागरिक करत आहेत.
स्मार्ट सिटीअंतर्गत नवी मुंबई महापालिकेने सात वर्षांपूर्वी ठाणे-बेलापूर मार्गावर महापे येथे ई- टॉयलेटचे प्रातिनिधिक स्वरूपात उद्‌घाटन केले होते. त्यानंतर या मार्गावर नऊ ठिकाणी लाखो रुपये खर्चून ई-टॉयलेट उभारले गेले. पावणे उड्डणपूल, महापे स्कॉयवॉक, एमआयडीसी कार्यालयानजीक, रिलयांन्स कंपनी, तळवली नाका, रबाळे पोलिस ठाणे, सिमेन्स कंपनी व उरण जंक्शन आदी ठिकाणी ई-टॉयलेट बसवण्यात आले आहेत. या ई-टॉयलेटमधून सुरुवातीच्या काळात एक रुपये, दोन रुपये किवा पाच रुपयांची नाणी टाकून वापर केला जात होता, मात्र या टॉयलेटच्या कॉइन बॉक्समधील पैसे चोरीला जाऊ लागले. त्‍यामुळे महापालिकेने हे टॉयलेट सर्वांसाठी विनामूल्य केले. त्‍यामुळे महामार्गावरील अनेक प्रवाशांना दिलासा मिळला होता, मात्र काही कालावधीनंतर ई-टॉयलेटच्या देखभाल दुरुस्‍तीकडे महापालिका प्रशासनाचे दुर्लक्ष होऊ लागले. त्यामुळे अस्वच्छतेमुळे तसेच पाण्याचा अभाव व विद्युत रोषणाई बंद असल्याने या टॉयलेटचा वापर करण्यात अनेक अडचणी येऊ लागल्या. आता मात्र पालिकेकडून या ई-टॉयलेटच्या ठिकाणी स्मार्ट पब्लिक टॉयलेट उभारण्यात येणार आहे.
.....................
अनैतिक कृत्ये व मद्यपींचा वावर
ई-टॉयलेटच्या आजूबाजूला अनैतिक कृत्ये व मद्यपींचा वावर वाढल्याने महिलांना येथे जाणे असुरक्षित वाटत आहे, तर वाहनचालकही टॉयलेटजवळ वाहन थांबवण्यास टाळाटाळ करत आहेत. काही ठिकाणी तृतीयपंथीयांचे टोळके संध्याकाळी आणि रात्रीच्या वेळेस टॉयलेट परिसरात थांबताना दिसत असून, त्यामुळे परिसरातील सुरक्षिततेचा प्रश्न निर्माण झाला आहे.
................
कोट
महापालिकेने जुने ई-टॉयलेट हटवून त्या जागी ‘स्मार्ट पब्लिक टॉयलेट’ उभारण्याचा निर्णय घेतला आहे. यासाठी निविदा प्रक्रिया सुरू असून, लवकरच काम सुरू होण्याची शक्यता आहे. तसेच तृतीयपंथीयांकडून गैरवापर होत असल्यास, त्यासंदर्भात पोलिस प्रशासनाला पत्र दिले जाईल.
-शिरीष आरदवाड, शहर अभियंता, नवी मुंबई महापालिका