नवी मुंबईच्या पुनर्विकासाला काँग्रेसचा विरोध

नवी मुंबईच्या पुनर्विकासाला काँग्रेसचा विरोध
नागरिकांच्या सुविधांवर ताण वाढणार; शहराचे होणार विद्रुपीकरण
जुईनगर, ता. २४ (बातमीदार) : नवी मुंबईतील धोकादायक व जुने घरगुती बांधकाम क्लस्टर पद्धतीने पुनर्विकासाच्या दिशेने पुढे जात आहे. राज्याचे उपमुख्यमंत्री एकनाथ शिंदे यांनी या प्रकल्पाला हिरवा कंदील दाखविला आहे. त्यामुळे आता तीन ऐवजी चार एफएसआय मिळणार असल्याने रहिवाशांना अधिक मोठ्या घरांची आशा निर्माण झाली आहे. या निर्णयाचे अनेकांनी स्वागत केले असले तरी, काँग्रेस पक्षाचे ओबीसी सेल जिल्हाध्यक्ष संतोष सुतार यांनी या पुनर्विकास प्रकल्पाला तीव्र विरोध दर्शवला आहे.
सुतार यांनी यापूर्वीच मुख्यमंत्री, उपमुख्यमंत्री आणि पालिका आयुक्तांना पत्र पाठवून या निर्णयाविरोधात भूमिका मांडली आहे. त्यांच्या म्हणण्यानुसार, नवी मुंबईतील लोकसंख्या या पुनर्विकासामुळे झपाट्याने वाढेल. परिणामी पाणीपुरवठा, पार्किंग, आरोग्य व शिक्षण सुविधा यावर प्रचंड ताण येईल. सध्या पालिकेला प्रकल्पग्रस्तांना सुविधा पुरवताना अडचणी येत आहेत. अशा परिस्थितीत आणखी भार पेलणे अशक्य होईल. सिडकोने नवी मुंबई वसवताना आमच्या मैदानांचे भूखंड विकसकांना दिले. त्यामुळे आज नवी मुंबईतील मुलांना खेळायला मैदाने नाहीत. त्यांना पैसे मोजून टर्फवर खेळावे लागते. शाळा-महाविद्यालये भरमसाट फी घेत आहेत. याअगोदरच सुविधा अपुऱ्या असताना बिल्डरांना फायदा करून देण्यासाठी पुनर्विकासाच्या नावाखाली सामान्यांची गळचेपी केली जात आहे.
....................
नागरिकांनी जागरूक राहावे
संतोष सुतार यांनी स्थानिक जनतेला सतर्क राहण्याचे आवाहन केले आहे. पुनर्विकासाचा हा डाव प्रकल्पग्रस्तांच्या गरजेपेक्षा बिल्डरांच्या फायद्यासाठी आखला जात आहे. सिंगापूरसारख्या शहराचे स्वप्न दाखवत नवी मुंबईची अवस्था यूपी-बिहारसारखी होण्यास वेळ लागणार नाही. स्थानिक नेत्यांनीही या प्रकारास विरोध केला पाहिजे. त्‍यामुळे संबंधित केंद्रीय मंत्र्यांच्या भेटीसाठी दिल्लीला आलो असल्याचे सुतार यांनी सांगितले.