३ कोटी ७७ लाखांचा गुटखा जप्त

नवी मुंबई, ता. २४ (वार्ताहर): नवी मुंबई पोलिसांच्या अमली पदार्थ विरोधी पथकाने भिवंडी तसेच मध्य प्रदेशातून आणलेला तीन कोटी ७७ लाख २८ हजारांचा प्रतिबंधित गुटख्याचा साठा जप्त केला आहे. या कारवाईत पाच कंटेनर आणि चार आरोपींना अटक करण्यात आली गुटख्याचा साठा कोठून तसेच कोठे विक्रीसाठी नेला जाणार होता, याचा तपास पोलिसांकडून सुरू आहे.
मुंबई-पुणे महामार्गावर कामोठे भिवंडी येथून आलेला टेम्पो अमली पदार्थ विरोधी पथकाने पकडला होता. या कारवाईत पोलिसांनी फरहान शेखला (२३) तब्बल २२ लाख ४० हजार रुपये किमतीच्या गुटख्यासह ताब्यात घेतले होते. चौकशीदरम्यान गुटख्याचा साठा भिवंडीतील येवई गावातून आणल्याची कबुली आरोपीने दिली. या माहितीच्या आधारे पथकाचे वरिष्ठ पोलिस निरीक्षक संदीप निगडे, सहाय्यक पोलिस निरीक्षक नीलेश धुमाळ, सूरज गोरे यांच्यासह २० पोलिस अंमलदार यांच्या मदतीने नाशिक-ठाणे महामार्गावरील येवई गावात छापा टाकला. या वेळी गुटख्याने भरलेले ४ कंटेनर आढळून आले. या कारवाईत पोलिसांनी तीन चालकांना अटक केली आहे. त्यानंतर अन्न व औषध प्रशासनाच्या अधिकाऱ्यांच्या मदतीने चारही कंटेनरची तपासणी केली असता तब्बल तीन कोटी ५४ लाख ८८ हजारांचा प्रतिबंधित गुटखा असल्याचे आढळून आले.
----------------------------------------------
कारवाईत चौघांना अटक
अमली पदार्थ विरोधी पथकाने जितेंद्र वसुनिया, भूपेंद्र सिंग, भंवर खेमराज सिंग यांना अटक केली. या कारवाईत आतापर्यंत चार आरोपींना अटक करण्यात आली आहे. तसेच कामोठे कारवाईत पकडण्यात आलेला आरोपी फरहान शेखला न्यायालयाने २५ जुलैपर्यंत पोलिस कोठडी ठोठावली आहे, तर इतर आरोपींना गुरुवारी न्यायालयात हजर केले जाणार आहे.