रेल्वे पोलिसांची आगळीवेगळी मोहिम : हरविले ५०० मोबाईल त्याच्या मूळ मालकांना परत करणार !

रेल्वे पोलिसांची आगळीवेगळी मोहीम
५०० मालकांना परत मिळणार चाेरलेले मोबाईल फोन
सकाळ वृत्तसेवा
मुंबई, ता. २४ : मोबाईल चोरी झाल्यानंतर तो परत मिळेलच, अशी अपेक्षा अनेकदा राहत नाही; परंतु लोहमार्ग पोलिसांच्या विशेष मोहिमेअंतर्गत तब्बल ५०० मोबाईल फोन हस्तगत करण्यात आले असून, हे सर्व मोबाईल मालकांच्या हाती परत देण्यात येणार आहेत. हा कार्यक्रम शुक्रवारी (ता. २५) सायंकाळी चार वाजता घाटकोपर येथील रेल्वे पोलिस मुख्यालयाच्या नवरंग सभागृहात पार पडणार आहे.
लोहमार्ग पोलिस आयुक्तांच्या आदेशाने चोरीला गेलेले मोबाईल शोधण्याची विशेष मोहीम राबवण्यात आली होती. तांत्रिक प्रणालींचा वापर करून मुंबईतील विविध पोलिस ठाण्यांनी शेकडो मोबाईल परत मिळवले असून ते परत देण्यात येणार आहेत. प्रत्येक पोलिस ठाण्याला या कार्यक्रमासाठी किमान तीन मोबाईल फिर्यादींसह, तर गुन्हे शाखेस २० ते २५ मोबाईल फिर्यादींसह उपस्थित राहण्याचे आदेश देण्यात आले आहेत. ५०० मोबाईल फोन प्रसारमाध्यमांसमाेर मांडता येतील, अशी व्यवस्था करण्यात आली आहे. या उपक्रमामुळे नागरिकांचा पोलिसांवरील विश्वास अधिक मजबूत हाेईल, तसेच चोरीस गेलेल्या वस्तू परत मिळण्याची आशा पुन्हा निर्माण हाेईल, असा विश्वास वरिष्ठ अधिकाऱ्यांनी व्यक्त केला आहे.