धावत्या मालगाडीचे कपलिंग निखळले

धावत्या मालगाडीचे कपलिंग निखळले
कसारा मार्गावर वाहतूक ठप्प

सकाळ वृत्तसेवा
मुंबई, ता. २४ : मध्य रेल्वेच्या शहाड ते आंबवली स्थानकांदरम्यान धावत्या मालगाडीचे कपलिंग निखळण्याची घटना गुरुवारी दुपारी घडली. या प्रकारामुळे कल्याणहून कसाऱ्याकडे जाणारी रेल्वे वाहतूक पूर्णपणे विस्कळित झाली. लोकल व मेल-एक्स्प्रेस गाड्यांची वाहतूक खोळंबली आणि प्रवाशांना मोठ्या गैरसोयीला सामोरे जावे लागले.
मिळालेल्या माहितीनुसार, संबंधित मालगाडी गुरुवारी दुपारी १२.५०च्या सुमारास डाऊन मार्गावरून जात होती. शहाड व आंबवली स्थानकांदरम्यान एका डब्याचे कपलिंग निखळल्यामुळे मालगाडी दोन भागांत विभागली गेली. या घटनेत कोणतीही जीवितहानी झाली नाही; मात्र कसाऱ्याच्या दिशेने जाणारी वाहतूक तात्पुरती ठप्प झाली. घटनेची माहिती मिळताच मध्य रेल्वेचे अभियांत्रिकी पथक तत्काळ घटनास्थळी दाखल झाले. तांत्रिक काम पूर्ण करून सुटलेले कपलिंग पुन्हा जोडण्यात आले आणि साधारणतः ३० मिनिटांनंतर मालगाडी मार्गस्थ करण्यात आली. दरम्यान, या मालगाडीमुळे मागे तीन उपनगरी लोकल रखडल्या होत्या. जवळपास अर्धा तास कसारा मार्गावरील संपूर्ण वाहतूक ठप्प झाली होती. यामुळे रेल्वेच्या वेळापत्रकावर मोठा परिणाम झाला. या घटनेचा परिणाम संध्याकाळी ५ वाजेपर्यंत कसारा मार्गावरील उपनगरी लोकल व मेल-एक्स्प्रेस गाड्यांवर दिसून आला.