बोगद्याचे काम पुढच्या महिन्यात सुरू होणार

गोरेगाव-मुलुंड जोडरस्ता प्रकल्प
बोगद्याचे काम पुढच्या महिन्यात सुरू होणार

सकाळ वृत्तसेवा
मुंबई, ता. २४ : गोरेगाव-मुलुंड जोडरस्ता प्रकल्पाअंतर्गत दिंडोशी-गोरेगाव-दादासाहेब फाळके चित्रनगरी (फिल्मसिटी) दरम्‍यान उभारणाऱ्या उड्डाणपुलाच्या कामाला वेग आला आहे. फिल्मसिटी येथील बोगदा प्रकल्‍पाच्‍या भुयारी करणासाठी संयंत्र (टीबीएम) ऑगस्ट महिन्यामध्ये दाखल होणार आहे. पहिल्या टीबीएम मशीनचे भाग असलेले एकूण ७७ कंटेनर जपानहून शहरात येणार आहेत. आतापर्यंत यातील ५४ कंटेनर दाखल झाले असल्याची माहिती पालिकेच्या सूत्रांनी दिली. कंटेनर दाखल झाल्याने पुढच्या महिन्यात १४.५ मीटरचा व्यास असलेल्या बोगद्याचे काम सुरू होणार आहे.
दिंडोशी-गोरेगाव-दादासाहेब फाळके चित्रनगरी यादरम्‍यान सहा पदरी उड्डाणपुलाचे काम सुरू आहे. मुंबईत पूर्व व पश्चिम उपनगरांना जोडण्यासाठीचा हा रस्ता सुमारे १२.२० किलोमीटरचा महत्त्वाचा प्रकल्‍प ठरणार आहे. या भुयारीकरणासाठी टीबीएम यंत्र मागविण्यात आल्याची माहिती पालिकेच्या सूत्रांनी दिली. येथील दादासाहेब फाळके चित्रनगरी ते पूर्व उपनगरांमध्ये मुलुंड येथे खिंडीपाडापर्यंत जुळा व भूमिगत बोगदा बांधण्यात येणार आहे. हे बोगदे नॅशनल पार्कच्या डोंगराच्या खाली पूर्णपणे जमिनीखालून जाणार असल्याची माहिती पालिकेच्या सूत्रांनी दिली.
..............
तीन मार्गिका असणारा हा जुळा बोगदा
भूमिगत आणि जुळ्या बोगद्याच्या बांधकामाचे कंत्राट जे कुमार-एनसीसी यांना देण्यात आले आहे. एका टीबीएमचे सर्व भाग पोहोचल्यानंतर दुसऱ्या टीबीएम मशीनचे भागही डिसेंबर २०२५ पासून येण्यास सुरुवात होईल. प्रत्येकी तीन मार्गिका असणारा हा जुळा बोगदा साकारण्यासाठी एकूण ६० महिन्यांचा म्हणजेच पाच वर्षांचा कालावधी अपेक्षित आहे. एकमेकांना समांतर असे हे जुळे बोगदे प्रत्येकी ४.७० किलोमीटर व्यासाचे असतील.