बेकायदा लॉटरी, जुगारात सहभागी होणे टाळा!

बेकायदा लॉटरी, जुगारात सहभागी होणे टाळा!
एमपीडीएमध्ये महत्त्वाची सुधारणा

मुंबई, ता. २४ ः बेकायदा जुगार, लॉटरी अथवा तत्सम प्रकारच्या जुगारांमध्ये सहभागी होणे टाळावे, असे आवाहन सरकारकडून करण्यात आले आहे. महाराष्ट्रातील झोपडपट्टीतील गुंड, हातभट्टीवाले, औषधी द्रव्यविषयक गुन्हेगार, धोकादायक व्यक्ती, दृकश्राव्य कलाकृतींचे विनापरवाना प्रदर्शन करणाऱ्या व्यक्ती (व्हिडिओ पायरेट्स), वाळू तस्कर आणि अत्यावश्यक वस्तूंचा काळाबाजार करणाऱ्या व्यक्ती यांच्या विघातक कृत्यांना आळा घालण्याबाबत एमपीडीएमध्ये महत्त्वाची सुधारणा करून या कायद्याची व्याप्ती वाढविण्यात आली आहे.
उपरोक्त कायद्यामध्ये बेकायदा जुगार, बेकायदा लॉटरी आणि मानवी अपव्यापार करणाऱ्या व्यक्तींचा समावेश करण्यात आला आहे. या सुधारणेमुळे बेकायदा जुगार किंवा बेकायदा लॉटरी चालवत असेल किंवा ती चालविण्याची व्यवस्था करीत असेल किंवा बेकायदा लॉटरीची तिकिटे विकत असेल किंवा अशा कामाशी संबंधित असेल किंवा लॉटरीबाबतच्या कायद्यान्वये शिक्षेस पात्र अपराध करीत असेल अशा व्यक्तींचा यात समावेश करण्यात आला आहे. या विघातक कृत्यांमुळे सार्वजनिक सुरक्षेला बाधा निर्माण होत असेल किवा होण्याची शक्यता असेल अशा गुन्हेगारांविरुद्ध नमूद एम.पी.डी.ए. अधिनियमान्वये स्थानबद्धतेसारखी कठोर प्रतिबंधक कारवाई करण्याचे अधिकार पोलिसांना मिळाले आहेत.