डोळखांबमध्ये बिबट्याचा मुक्त संचार

डोळखांबमध्ये बिबट्याचा मुक्तसंचार
शहापूर, ता. २४ (वार्ताहर) ः शहापूर तालुक्यातील डोळखांब भागातील खराडे व कथोरेपाडा या गावांच्या परिसरात बिबट्याचा संचार आढळून आला आहे. कथोरेपाडा येथील रवींद्र कथोरे या ग्रामस्थाच्या घराच्या आवारात बुधवारी (ता. २३) रात्री बिबट्या फिरत असल्याचे सीसीटीव्ही कॅमेऱ्यात कैद झाले आहे. यामुळे नागरिकांत भीतीचे वातावरण आहे.
डोळखांब परिसरापासून पुणे जिल्ह्यातील जुन्नर, माळशेज घाटाचा परिसर जवळ असून दुसऱ्या बाजूने अहिल्यानगर जिल्ह्यातील अकोले तालुक्यातील घाटघरचा डोंगर, दऱ्यांचा व जंगलाचा परिसर नजीक असल्याने येथे बिबट्यांचा वावर सतत असतो. सध्या डोळखांब पंचक्रोशीतील गुंडे व चोंढे गावांच्या भागात बिबट्या आढळून येत आहे. बुधवारी खराडे व कथोरेपाडा भागात आढळून येत असलेला बिबट्या कुत्र्यांच्या शिकारीच्या निमित्ताने वाट भरकटलेला आहे. त्याचे वयोमान साधारण तीन वर्षे इतके असावे व हा नर जातीचा बिबट्या आहे. वनविभागाने डोळखांब परिसरातील गावांमध्ये गस्त वाढविली आहे. नागरिकांनी आपले पाळीव कुत्रे रात्री घरात ठेवावे, बाहेर ठेवू नये. तसेच शेतकऱ्यांनीदेखील आपले पशुधन गोठ्यात सुरक्षित ठेवावे. सर्व दृष्टिने काळजी घ्यावी. वनविभाग जनजागृती करीत आहे, असे वनक्षेत्रपाल अजय चव्हाण यांनी सांगितले.