गोमांसविक्री करणाऱ्यांवर ‘मकोका’

गोमांसविक्री करणाऱ्यांवर
राज्यात प्रथमच ‘मकोका’

बदलापुरातील प्रकरणात कारवाई

बदलापूर, ता. २४ (बातमीदार) : येथील गोमांसविक्री गुन्ह्याप्रकरणी राज्यात प्रथमच आरोपींविरोधात ‘मकोका’नुसार कारवाई करण्यात आली आहे. जूनमध्ये पोलिसांनी गोमांसप्रकरणी बदलापूर गावात कारवाई केली होती. याप्रकरणी दोन गुन्हे दाखल असून त्यातील काही आरोपींचा शोध सुरू आहे. या कारवाईमुळे गोमांसविक्री करणाऱ्यांचे धाबे दणाणले आहेत.
गोवंश जातीच्या गुरांची बेकायदा कत्तल करून गोमांसविक्री करणाऱ्यांवर ‘मकोका’नुसार कारवाई केली जाईल, असे आश्वासन राज्य सरकारने पावसाळी अधिवेशनात दिले होते. बदलापूर आणि आसपासच्या परिसरात गोवंश जातीच्या मुक्या जनावरांची हत्या करून गोमांसविक्री केली जात असल्याचा प्रकार बदलापुरात समोर आला होता. याप्रकरणी अंबरनाथचे सहाय्यक पोलिस आयुक्त शैलेश काळे यांच्या गोपनीय माहितीनंतर ९ जूनला बदलापूर गावात पोलिस पथकाने छापा टाकला होता. येथे गोमांस आढळल्याने याप्रकरणी बदलापूर पश्चिम पोलिस ठाण्यात गुन्हा दाखल करण्यात आला होता. या गुन्ह्याचा प्राथमिक तपास सुरू असताना बदलापूर पूर्व पोलिस ठाण्याचे पोलिस निरीक्षक राजेश गज्जल यांच्याकडे हा तपास देण्यात आला. याप्रकरणी कैफ मन्सूर शेख हा पोलिसांच्या हाती लागला. त्यानंतर उदली उर्फ सैफ मन्सुर शेख याला अटक केली. त्याच्या नेतृत्वाखाली गोमांस विक्री सुरू होती. दरम्यान, गोमांसविक्रीप्रकरणी पोलिसांनी मोक्का अंतर्गत कारवाई करता येईल का याबाबत चाचपणी सुरू केली होती. अखेर या गुन्ह्यात महाराष्ट्र संघटीत गुन्हेगारी नियंत्रण अधिनियम १९९९ च्या कलमांचा समावेश करण्यात आला आहे. कैफ मन्सुर शेख आणि उदली उर्फ सैफ मन्सुर शेख यांना न्यायालयाने २९ जुलैपर्यंत पोलीस कोठडी सुनावली आहे. या गुन्ह्यात ‘मकोका’अंतर्गत राज्यात प्रथमच कारवाई करण्यात आली आहे, असे परिमंडळ ४ चे पोलिस आयुक्त सचिन गोरे यांनी सांगितले.